Сегизинчи мартда, танг аласында,
Халкъны тар ырбыннга тыйдыла.
Сабий, къарт демей, халкъны барысын да
Мешиналагъа жыйдыла.

Тау къушла кибик, ёхтем таулу жашла
Урушда къазауат этелле.
Иесиз къалып, къабырла, сын ташла,
Халкъымы уа къайры элтелле?

Терслигибиз болмай, алып баралла,
Къайры элтгенлерин билмейбиз.
Къартауларыбыз узакъда къалалла,
Биз а ышармайбыз, кюлмейбиз.

Таулада къалгъан итлени юргенлери
Жюрег'а жауунгу ашайды.
Саулукъ ийнеклени ёкюргенлери
Къыяма айланнганнга ушайды.

Биз хариплени алыб'а баралла,
Вагонла, сынжырча, тизилип.
Жолда атылгъанлай кёпле къалалла,
Жашар ёмюрлери юзюлюп.

Къабырларын ёксюз къоймазла таулула,
Эртте, кеч болса да, къайтырла.
Адамлыкъларын жоймазла таулула,
Терслеге дауларын айтырла.