Tañgnı töben canı az belgi berirge
Tögerekni askerle aldıla.
Atala, karnaşla - barı da uruşda,
Bizge ne kıyınlık saldıla!
Tawuk kıçırıgı, sabiy cilâganı
Cürek cawuñgu aşay turalla.
Oy, kart kişileni, tişirıwlanı
Uşkok kalak bla uralla.
Kıynalıp işlegen bizni collarıbız
Kaldıla bukulap, çars etip.
Carlı Karaçaynı koratıp baralla,
Bu Kafkaz tawladan tas etip.
Bizni curtubuzdan sibirip baralla,
«Studebekerle» küçlü duwulday.
Ay, carlı Kafkazım, sen kalıp ketgense,
Narat terekleriñg şuwulday.

Koylanı sürgença, bu biz carlılanı,
Kuwup, vagonlaga cıyalla.
Bıllay kıyınlıknı körüp, kötüralmay,
Ay da, kün da birden cilâyla.
Oy, Miñgi Tawubuz bizge cilây kaldı,
Ol ak sakalın da suw etip.
Mından nek koratıp baradıla bizni,
Günahıbız bolmay, kuw etip?
Karaçay Kobanı karalıp cilâydı:
«Meni Karaçayım ketdi», - dep.
Ol ızıbızdan bir mugur bolup kaldı:
«Ne ullu kıyınlık cetdi!» - dep.
Bu kıyınlıklanı kötürüp turalmay,
Bügülüp, cilâyla terekle.
Hucu kaldıla da, baytamal boldula
Karaçayda kolan iynekle.
Sırtlada, kollada uluy aylanalla
Ullu Karaçaynı itleri.
Kaysı milletlege aş-azık boldula
Kıynalıp macargan mülkleri?
Biz ketgenli kurup kalgandıla, deydi,
Kara suwla, cerge cutula.
Sau Şimal Kafkazga çaçıldıla, deydi,
Karaçaydan kalgan cılkıla.
Bizni üyleribiz kalıp ketgendile,
Eşikle artlarından tartılıp.
Carlı Karaçayım eki teñg bolgandı,
Aşsız-suwsuz cerge atılıp.