Anasayfa | Kayıt | Giriş Hoşgeldiniz Ziyaretçi | RSS
[ Yeni mesaj · Üyeler · Forum kuralları · Arama · RSS ]
  • Page 1 of 1
  • 1
Forum (Nığış) » GENEL BÖLÜM » Edebiyat Sanat » Hamamnı direktoru---Bizni tilde tiyatro
Hamamnı direktoru---Bizni tilde tiyatro
AssıTarih: Çarşamba, 19-08-09, 8:54 PM | Mesaj # 1
Albay
Grup: Admin
Mesaj: 93
Ödüller: 0
İtibarlarınız: 5
Konum: Dışarıda

Ebzelanı Şaharbiy.

"Hamamnı direktoru"

(Hamamnı direktorunu kabinetinde direktor da kaçegar da şahmat oynaydıla. Ekisi da burunları bla muruldab oraydanı tartadıla).

DİREKTOR (cırlağanın da tohtatıb, bir kesekden): - Cürü-cürü-cürü …..cürü munu!….. Ne saklaysa?….Tañña deri cırlabmı turluksa munu! Cürü!
KAÇEGAR (oraydasın buzub): Busağat cürüyme (biyağı oraydasın cırlaydı….Bir kesekden sabır bola) - Karaçı ..ı…..! Karaçı….. Ma munu bla ma munu kabdım, (küle-küle) kördüñmü ..ı…, kabdım da koydum ı….
D: - Kayrı alıb barasa!? Kayrı alıb barasa, deyme, men senñe anı!? Sen anı kabsañ, men ne zat bla oynarıkma!?
Q: - Da… kabhan etdim da?
D: - Kim erkinlik bergendi kabarğa?! Sal ornuna!
Q: - Da… sal dey eseñ salayım?
D: - Vot… sal! Başha hod et! (kaçegar akırtınçık oraydanı tartıb başlaydı):
Q: - I… karaçı, endi wa! Ma munu bla ma munu kabdım ı!
D: - Da munu, üyü kuruğannı, bir kıyırından tutub, bir kıyırına sozub kelmegeñe ne boladı?! Munu bılay ortarağında koysañ ne bollukdu!? Korat ızına!
Q (oñsunmay): - Da, sal dey eseñ, salayım?
D: - Vot… korat ızına! Başha hod et! (Kaçegar oynamay ketib başlaydı) Oynamay keterge umut etme! Beri kayt, deyme, men señe! Beri kayt! Oynamay ketseñ, tambla sen da işiñden ketdiñ!…. Vsö!
Q: - Da… Kaçaña deri oynarıkbız biz bılay bla?
D: - Men seni kabhınçıña deri oynarıkbız! Oynab kaçaña deri oynarıkbız?! Tañña deri oynarıkbız. (kaçegar ızına olturadı) Sağış et!
K (Biyağınlay cırlağanın tohtatıb): - Ha…a! karab turçu endi wa! Endi wa karab tur! İgi karab tur! Ma bılaydan, ma bu col, ma bılayğa mat!!! Mat boldu da kaldı! Hı-ı, kördüñmü!?
D (Kesin cıları kelgença etib ): - Oy, amandan mat bolğun sen! Mat etseñ, boladı mat! Ansı kesi allına mat bolsa, üyü kuruymudu!
Q: - Da, al dey eseñ, ızına alayım?
D: - Tiyme! Mat bolub turğanın közüñ körmeymidi!? Oğay, men añlamağan bir zat bardı: adam direktoruna mat kalay saladı…ne?
Q: - Da, bu oyundu da.
D: - Ne! Ne zat oyun!? Oyunuñ, başıñ da kuruğun! Bılanı jığırdağan taўuşların eşitdirme bügünden sora menñe! Kaçegarkañda oynarsa. korab ket közümden!
Q: - Da, kesiñ tülmüse har kuru da kelib: "kel, oynay eseñ", deb turğan ...hı-ı!?
D (İgi eşitmey kalğança etib): - Ne deyse?
Q (korkub): - I-ı-ı… men barayım…, ı-ı-ı, men barıb kaçegarkada suwnu cabayım.
D: - Bar!… Suўnu da cab, har zatıñı da igi tındır! (kaçegar kete başlağanlay, telefon zıñırdaydı) Beri kayt! Beri kayt deyme men senñe! Al trubkanı! Al!
Q (Trubkanı alıb): - Allo?
D: - Tohta-tohta! Ne "allo" deb tebreyse! Sorğanları bolsa, men mında cokma de! Rayonña ketgendi de! İgirek tebse, arı oblastha ötüb keterikdi de! Bir zatla ayt da alda!
Q (Cunçub): - A-allo? … Mında cokdu…! Rayonña ketgendi… İgirek tebse, oblastğa ötüb keterge da bolludu… Da, anı bilmegen bolamıdı? Atı Sarıbaş, atasını atı Tokmak…
D (Oñsunub): - I-ı, molodets!
Q (Trubkağa): - Men a… men anı zamestitelime… kaçegar.
D: - Ay, amandan tokmak bolğun sen!
Q: (Trubkağa): - Kellikdi! Kelmey kalay kalır ol! Kelib ornuna olturmay, halknı allında cumuşun tolturmay, kalay koyar ol!?
D: - Bılay bu senden polnıy atçöt alıb, bu seni bla kesine bazıb, gırıldarğa küreşgen kimdi!? Trubkanı bılay koluma bir cetdirçi! Bılay ber ol trubkanı! Bılay ber! (Trubkanı sermeb alad) … Ne ўa tohtaçı…Ol men aytırıqnı kesiñ ayt da koyçu! Vale de! Ma! (Trubkanı ızına beredi).
K (Bekden bek cunçub): - A-allo? I-ı vale de, deydi!
D: - Tohta, a üyüñe, valeni koşma da, dedini, kesin aytıb koy!
Q: - Dedini koşma da, Valyanı kesin aytıb koy, deydi!
D: - Tohta-a-a munu! kayda körese Valyanı!? Bılay ber trubkanı, bılay ber! (Trubkanı sermeb alıb, qolu bla cabadı) kayda körese Valyanı, üyüñ kurumağan! …kayda Valya!
Q: - Da, kesiñ aytdıñ da, alay ayt deb!
D: - Alay aytama men: "vale, vale", - degen eki sözden sora cuk aytma deb, nença kere aytama, haparıñ aytıllık suwbaş. (Trubkanı kulağına saladı) Allo? …Da! …Hamamnı direktoru Sarıbaş Tokmakoviç! …Tıñılayma! …Da! ….I-ı! …A üyüñe, "vale" degen söznü adam nesine çarlaydı? "Vale" degen söz, ol latin sözdü! Sav kal degen mağananı ornun tutadı! ….Da, ne añılamağanı bardı munu? …Alaydı! Zamestitelim suv ustadı. Bılay, neme ı-ı, …hoў, latinça suv ustadı. Başha tilde söleşirge çırtdanda unamaydı. …Hamamnı kelseñ körürse, igi caş! …Vsö! …Vale! (kaçegarğa karab) Ket allımdan! Çırtdanda bu açıv bolub turğanı bla katımda sirelme! korab ket busağat!
Q (Hıylaçı tülküça, ışarıb): - Sarıbaş?
D (Bir kesek cumuşab): - korab ket, deyme, busağat, açıv bolub turğanı bla süelme allımda! Seni ol telefoña söleşgeniñ da nege uşay edi?
Q (Arakı içgenni belgiletib): - Sarıbaş?
D (Sabır bolub, taўuşun da akırtın etib): - Endi beri tıñıla! Mağomet tükenni açhan bolur, bar da: "Sarıbaş iygendi" - deseñ, kesi billikdi. Başım çaçılıb baradı. Bir şışaçık al da kel! …Hayda!
Q (uyala-uyala): - Hoў, men barayım. Men barıb suўnu cabhınçıña deri sen, ı-ı...nemeçikle hazır etib tur, ı-ı….ma körese da ı-ı …açhaçıklanı hazır etib tur! Hazır etib tur açhaçıklanı!
D: - Terk bol! …Bar! …Hayda bar! (kaçegar ketedi) …Altınçaç!
ALTINÇAÇ (Kirib kelib): - Çakırğanmı ete edigiz? ...Çakırğanmı ete edigiz, deyme?
D: - Ne çakırğanña kaldıñ? …Çakırmadım ese, kalay keldiñ?.. Bar, çakırsam kelirse!

Aç: - Sarıbaş, Ariwcan kelgendi da, senñe tübemey keterik tülme deydi. Ne eteyim?
D: - Ol soruўğa bir karağız! Ay üyüğüz kurumağanla, kallay bir üretirikme men sizni? Ürenigiz! Men savlukda başığızğa bir akıl cıyığız! Men boşmu turama bılayda? Ma bu qağıtlanı köremise stol üsünde? Men ma busağatdan, mıçımay, rayonña barlıqma, soveşçaniyağa. İgirek tebsem, oblastha ötüb keterge, artıma turluq tülme. Ariўnu bas da, barma qoy! Munu ne zatın sağış etese? İşi bolubmu carsırıqdı? Artda kele-kelir. Bar!

Aç: - Bolsun. (Ketedi).
(Eşikni artın saqlab turğan Ariwcan, dağıda talay bir adam, kabinetge kirir umut bla dawur etedile. Kaçegar qaytıb keledi).
D (Qaçegarğa): - Bu kabinet menikimidi, oğese meniki tülmüdü?
Q: - Senikidi!
D: - Da meniki ese, nedi bu bılayda qıçırıq-sıyıt? Soqmaq salıb, nedi bu oçered? …Bılayı gastronommudu? …Ne ўa bılayda küyüzlemi satıladıla, bılayda, kremplinle? …Bu hamamdı! …Adamla bılayğa cuўunurğa keledile!…ayt da añılat!
Q (Adamlağa): - Añılağız, bılayı hamamdı! Adam bılayğa cuўunurğa keledi! (Daўur tohtamaydı. Kaçegar qıçıradı). Direktor bir qağıtha qol saladı, bir qağıtha redaktsiya saladı, bir qağıtha peçat saladı, a siz a anı işlerge qoymaysız!
(Direktor süek şahmat bla, stolğa urub, peçat taўuş etdiredi).

D (Seyirsinib): - Tohtab qaldıla bolurla deyme?
Q: - Hoў.
D: - Molodets, suўbaş. Endi bılanı bu jığırdağan taўuşların menñe eşitdirme!
Q: - Hı-ı!
D: - Bolduñmu? …Hı-ı! …Bar! Ne saqlaysa?
Q: - Endi men barayım, sen, ol aythanıñça, ber menñe! Hı, …aythanıñça, men alıb keleyim, barıb.
D: - Qoluñu beri sozub tur, bılay ne bolsun! Oğay, men seni bla işlegenli bir şışanı, bılay, alıb kelib, allıma salğanmısa? Bılay, alıb kelib, şışanı, ma iç deb allıma salsañ, üyüñ quruymudu, qoluñu sozulmaq bolub, beri sozub turmay?!
Q: - Sora menden mat alıўçu sen, señe şışa alıўçu da men bolubmu turluqma?
D: - Ne dediñ? Entda birçik, qaytarıb, bir aytçı!
Q: - Oğay, men barıb keleyim ...ı-ı-ı, erlay tükeñe, busağat qaytırıqma.
D: - Ma! Ma senñe açha! Bar! Bar da şışa alda kel! Terk bol, hayda! Bar!
K (Kete başlab, qaytıb): - A-a! Unutub qoya edim… Ma bu qağıtnı senñe deb tabhanma. (Bir qağıtçıqnı uzatıb, çığadı).
D (Qağıtnı qoluna alıb): - Ne zatdı bu a? …Tohta, nele-nele deydi? …Bu qağıtda nele cazılıb turadı, Allah üçün? …"Kiştik 10-12 cıl caşaydı"…T-a-aq! "Qoy - 10 cıl"…Taq! "Taўuq", taўuq da bar köreme, horoşo-o! "taўuq - 15 cıl". …Oğay, ol qalayğa barğan zatdı!? Şo endi, aman taўuq da, añılaymısa, gaqqıla tabama deb, qozula bergen qoydan 5 cılnı artıq caşarğa qolundan qalay keledi!? …Ne-ye-pravilna!!! …"İynek - 20 cıl". İynek caşasın! "Sarıўbek bla haram çabaq - 100-150 cıl", O! Ollahi, molodtsı! Tak… "Eşek", (quўanıb) eşek da bar köreme! Horoşo! Aq burun eşek 50 cıl caşaydı! Ay molode-yets! Eşek, Ollahi, caşasın. Ollahi, qolumdan kelse, aram-qaram etmeyin, eşekge entda bir 50 cılnı qoşub barma qoyar edim, deb Allah bla ant eteyim! Eşek bolmasa coqdu adam! İynanığız! (Telefon zıñırdaydı. Direktor telefonnu alıb, qoşaqlanıb) Hamamnı direktoru Sarıbaş Toqmaqoviç! Tıñılayma! …Da!? …Da-da? …Kimlanı da-damı? …A üyüñe, tuqumun aythanlığm tüldü, ol sen aythan sözlege "da, da" degenligimdi… Da ne añılamağanlığı bardı… qaraçayça aytsañ "hı, hı" degenligimdi… da sen… qallayla söleşese kesiñden tamadağa!? Da boşay tur institutnu! …Da sen bir institutnu boşab aqılıñ alay söleşirge cete ese, da men bir institut oğay, bir, eki, üç, tört deb, tört klas…dı-dı-dı…tört institutnu boşab olturub turama bılayda! …A-a-a, aşhı ulan, aytıb a nek aytama, esiñde bolsun, iş quru oquўda tüldü, iş köbüsüne kesiñi qalay cürütgeniñe köre baradı… Ollahi, diplomuñ boşuna atılıb qalır alay… Vale! (qülüb) Da "valeni" da bilmey eseñ, institutnu wa qallayla boşağansa? Vsö! Vale!
(Eşik açılıb Ariўcan kaçegarnı da teberib, daўuru bla kirib keledi)

ARİWCAN (Qaçegarğa): - Toba, caşçıq, türtmezse! Men türtsem, adamıça türtürme! (Qaçegar direktor taba qaçadı).
D: - Caş! Bar ornuña arı! Meni stolumu artına nek buğasa, kelib? Ornuña bar, deyme men senñe! (Ariўcaña) Egeçim, sizni bu etgenigiz a nedi? At oyun etib, kişi kabinetge alay kirib kelemidi?
Ad: - Da kelgenme! Qalayçıqğa olturturuqsuz?
D (Qaçegarğa): - Bar, arı olturt alay.
Q: - Ma bılayçıqğa olturuğuz, …amma!
Ad: - Meni atım amma tüldü, men Ariўcanma!
D: -How- how- how- how! …Tohta allayla etme, a üyüñe! (Qaçegarğa) Alayın caratmay ese, beri meni qatıma, stolğa cuўuq, olturt beri munu.
Q: - Ma bılayçıqğa olturuğuz, Ariўcan!
D: - Bılay meni qatıma olturuğuz, egeçim! Cuўuğuraqçıq.
Ad: - Meni atım Ariўcandı. Deligatsiya bolub kelgenme!

Direktor: - Hamamnı direktoru Sarıbaş Toqmaqoviç... Bek aşhı, bek alamat.
Qaçegar (Şıbırdab): - Sarıbaş, qara! Keltirgenme.
D. (Ol da şıbırdab): - Molodets, molodets, Qaracaş! Ha-a, caşağın! Endi bar da Altınçaçnı menñe terk ciber, sora, igi caşça, artdan kesiñ kele-kelirse!
Q. (Çığıb bara): - Altınçaç, direktor çaqıradı (Altınçaç kiredi)
D. : - Oltur, Altınçaç! (Ariўcanña) Taq! …Tıñılayma, egeçim!
Arücan: - …Tıñılay eseñ, tıñıla!
D. : - Sizden tilerim: bılay, zamanım azdı. Har zatnı cigin-ciligin ayırıb, ariў qıshasıça… Ma busağat rayonña keterikme. Hayda!
Ar. : - Bek cigin-ciligin ayırıb, bek qıshasıça añılatayım.
D. : - Añılat!
Ar. : - Endi, Sarıbaş-direktor, meni beri delegatsiya etib iygenle, halqnı amanatın tolturursa deb.
D. : - Bek aşhı, bek alamat! Caz! Har aythanın caz, Altınçaç! (Ariўcanña qarab) …Tıñılayma.
Ar. : - Endi, Sarıbaş-direktor, elde bek türlü mağanalı haparla cürüyle. Da, kerekmidi ol haparlağa iynanırğa, deb kelgenme, Sarıbaş-direktor?
D. : - Da, hapar-haparğa, anı aythan adam da, bılay, imanlı adamğa uşay esele, nek bolmaydı iynanırğa?
Ar. : - Hapar da uşaydı haparğa, adam da uşaydı adamğa. Bek qart da caş da süygen adam aythandı.
D. : - Da, kesin elçilege alay birden süydüre bilgen, nasıblı insan ol kim boldu?
Ar. (Tilburğuçnu aythan halda): - Bu haparnı, Sarıbaş-direktor, men Ciltinsizleni Topşaynı qızlığı Stependen aytıb eşitgenme. Aña da Amantişleni Balahay haribni qatını Suўsüymez aythandı. Amantişleni Balahay haribni qatınına da, Sapınsızlanı Cuğuliyni üy biyçesi Suўalas aythandı. Sapınsızlanı Cuğuliyni üy biyçesine da, Qaraşalbarlanı Maşallanı sabiylerini anaları Siltihan cetdirgendi…
D. (Ariўcannı tohtatır umut bla): - Tohta! to…
Ar. (Tohtaўsuz): - Qaraşalbarlanı Maşallanı sabiylerini anaları Siltihanña da, Elbuzduqlanı Toptıymaznı qatını Cantotay aytha…
D. (Tözalmay): - To-to-to-tohta! Tohta! Tohta! Tohta, üyüñ qurumağan, munu! Pulemet quyğança qayrı quyub barasa! …Egeçim, delegatsiya bolub kelgen eseñ, tileb aytama, aytırıñı ayt da, hayda bar! Zamanım coqdu!
Ar. : - Tohta, egeçim demeseñ, unutub qoyarğa başlağan edim. Sen Qaraşalbarlanı Maşallanı anaları Siltihan bla Elbuzduqlanı Toptıymaznı qatını Cantotay bir-birlerine qalay cuўuq cetgenlerin bilemise?
D. (Açıўlanıb): - O da, qaydan billikme men anı!? Ne wa, nek bilirge kerekme!?
Ar. : - Oў!?
D. : - Bilmeyme, bilirge da izlemeyme!
Ar. : - Bilmeyme, deydi! Bilmey eseñ, men bildireyim? …Tıñılayma de!
D. (Amanına tayanıb): - Tıñılayma.
Ar. : - Tıñılay eseñ tıñıla! Qaraşalbarlanı Maşallanı anaları Siltihan!
D. : - Siltihan, ta-aq!
Ar. : - Elbuzduqlanı Toptıymaznı qatını Cantotay!
D. : - Cantotay. (Tözüb turalmay) Da ne bolğandı bılağa? Bir ayt ne bolğandı!?
Ar. : - Da sen: sora ўa - de!
D. : - Astompirillya! Bu qıyıllıqga bir qara! …Sora ўa?
Ar. : - Sora ўa ne? I-ı… Cantotay bla Siltihan, ekisi eki carağan qatınladan tuўğanladan tuўğanlay turalla.
D. : - Ket, a üyüñe?
Ar. : - Hoў!
D. : - Qatınla qatınladan qallayla tuўadıla? Neni esede qatışdırasa bılayda!
Ar. : - Oğay-oğay, bir Allah qatışdırmayma!
D. : - Da, qalay qatışdırmaysa, üyüñ qurumağan! Qatınla qatınladan tuўub qaçan körgense! …Aqırtınçıq caraşdır da menñe añılat!
Ar. : - Añılatayım-añılatayım.
D. : - Kim kimden tuўğanın meñe añılatçı! Hayda!
Ar. : - Añılatayım. Qaraşalbarlanı Maşallanı sabiylerini anaları Siltihan!
D. : - Tak, Siltihan.
Ar. : - Elbuzduqlanı Toptıymaznı qatını Cantotay!
D. : - Cantotay, hı-hı.
Ar. : - Cantotay bla Siltihan…
D. : - Hı-hı?!
Ar. : - Ekisi eki carağan qatınladan tuўğanladan tuўğanlalla!
D. : - Da bıyağında tuўğanladan tuўğanlay turalla dey ediñ da, a üyüñe! Endi tuўub turalla, deyse! Kim kimden tuўğandı?
Ar. : - Siltihan bla Cantotay ekisi eki carağan qatınladan tuўğanlalla!
D. : - Da bıla, üyleri qurub, bu qatınla, añılaymısa, büğünlü biri birinden tuўğanladan tuўğanladan tuўğanlay turalla?
Ar. : - Alaydı-alaydı-alayd!
D. : - Da, sora bılanı, üyleri qurumağan ese, bu qatınlanı aralarında bir erkişi bolmağanmıdı!?
Ar. : - Oğay-oğay-oğay-oğay, erkişi tut ni pri çöm!
D. : - Net, egeçim! Erkişi kaq raz pri çöm!
Ar. : - Ni pri çöm!
D. : - Net, pri çöm!
Ar. : - Ni pri çöm!
D. : - Stop!!! (Qolu bla stolğa uradı).
Ar. : - Oğay, Cantotay bla Siltihan e….!
D. (Sözün bölüb): - Cab! Cab! cab! aўuzuñu! Cab! (Örge turub) Altınçaç, ne eterik eseñ da munu bılayda közün aça tur! Men busağat qaytayım.
Altınçaç: - Bolsun. (Direktor çığadı)
Ar. : - Nesin aça tur, dedi?
Al. : - Közün aça tur, deydi.
Ar. : - Ketibmi baradı! Da men boşamağanma sözümü!
Al. : - Direktor alay boş adam tüldü: kassirlikni, zavhozluqnu, kaçegarlıqnı tuthan bir adamdı. (Telefon zıñırdaydı. Altınçaç direktornu çaqırırğa ketedi. Ariўcan telefoña uzaladı).
Ar. (Telefonnu qulağına salıb): - Ale-ye…? Qurmanıñ bolayım, qaysısa? …Oğay-oğay, tülme direktor…, diyelegatsiyasıma! …Boş tüldü direktor - delegatsiya kelgendi! …Delegatsiyanı da em tamadası menme! (Direktor kirib keledi).
D. : - Hey!!! …Kim bla söleşese?
Ar. : - Seni soradıla.
D. : - Meni soradılamı?
Ar. : - Coqsa, degenme, mında, kelmegense, degenme, ma busağat…coqsa degenme …ı-ı-ı…
D. : - Cab! Cab! Cab aўuzuñu! Tohta! Bılay ber telefonnu! (Trubqanı qolu bla cabıb) Erkişimi edi, tişirıўmu edi söleşgen?
Ar. : - Erkişi edi.
D. (Qulağına salıb körüb trubqanı): - Da…, bu alına turadı da! Senmi alındırğansa munu!?
Ar. : - Oğay-oğay, men söleşmegenme.
D. : - Ne aythansa!?
Ar. : - Bir cuq da aytmağanma.
D. : - Da, bu alına turadı da!? (Trubqağa) …Allo? …Hı-hı… eşiteme… alay qıçırmasağız da eşiteme… Hamamnı direktoru Sarıbaş Toqmaqoviçme… Hoў, menme… (Taўuşun bir türlü etib, hıylaçı tülqüça) A-a-a! Sizmisiz? …Ollahi, bılay, aўazığızdan acaşhança da boldum allında, alay bolsa da tanıdım… Tanımay a sizni tanımasam, kimni tanırıqma… Hoў! …Ollahi hamamnı taşkömürün entda keltirtalmağanma… Tambladan qalmay keltirteme… Da-daqumentatsiyam da habba-hazırdı… Hoў! …Qaçan biterikdi cañı hamammı? (Trubqanı qolu bla cabıb, Ariўcanña qarab) Ne aytayım?
Ar. : - Bilmeyme.
D. : - Da aytıb ne aytırıqma, fundamenti salınmağandı sora. (Trubqağa) Da, cañı hamamnı sorsağız…, cañı hamam ne eterikdi? Turadı… ba-bardırabız degenligimdi. Bılay keçe-kün da üslerine sirelib, bir mazallı çögüçüm da qolumda, bu komanda degenni da berib, bek qızıўda bardırtama. Endi qısha zamannı içinde, Allah aytsa, biterik bolur cañı hamam. Ollahi, iynanığız, sağat carımnı kabinetge kirib qağıtlağa qararğa zamanım coqdu. …Hoў! …Bitdirebiz! …Biterikdi cañı hamam! …Salamıbız birgeley! (Trubqanı salıb, qolu bla töñegini oñ canından tutub) …Oy Allah cüregim!
Ar. : - Da, cüregiñ sol canında bolğa kerek tülmüdü?
D. : (Qolun terk sol canına taydırıb) - Da, senñe cüregiñ oñ canındadı degen kimdi? …Ay! Allah-Allah-Allah! …Oh-oh! …Biyağı meni cüregim tutdu! …Ma bılay, işge kesimi bereme, deyme da, oh! Allah!, Kesimi ayay bilmeyme işge cetsem, egeçim! Sora, tutsa da, bılay, qalğan adamladaçamı tutadı üyü quruğan. Ayıb etmegiz, bılay, sabırçıq ete turuğuz! Men bir cü…, darmançıq içib qaytayım. (Direktor çığadı. Telefon taўuş etedi)
Ar. : (Trubqanı alıb) - Ale-ye! Kim kerekdi! …Oğay coqdu mında! Da, darmançıq urtlarğa ketgendi! …Da, bek kerek ese ўa çaqırıb keleyim?

(Qoçegar kabinetge kirib keledi)
Qoçegar (Altınçaçha): - Qaydadı direktor!?
Altınçaç: - Bılay çıqğandı, busağat kellikdi!
Q.: - Sora sen meni anı üçün ayırıbmı kelese teñlerimden!?
Al: - Ket-ket, iyisden da alındırasa kesiñ da! Bılay çıqğanlayığızğa, qaydan içib kelesiz!? …Bu krannı suўu da sizge araqı bolub qalmağan ese bilmeyme!
Q: - Ayhay da, bu krannı suўu bizge araqı bolub qalsa ўa!
Al: - Ket-ket, iyisden alındırasa! İgi caş, bılay etib tursañ, barıb ataña-anaña da aytırıqma! Alay bolmasa wa, komsomol orğanizatsiyağa da barlıqma da, bolğannı da aytırıqma! Ol zamanda ўa kölüñ qalmasın!
Q: - Da, sora men da aytırımı aytıb qoyayım: men añılağan da bir zat bardı - ne da boşdu, ol seni allıq candan carlı adam bolurmu!?
Al: - O-o-o!!! (Başından tutub çığıb ketedi).
Q: (Stemeyni maqamın salıb) -
Keçe kün deb qaramay
Qulağımı qaşıyma,
Sarıbaşça tabhanımı
Men üyüme taşıyma.
Keçe kün d…
(Direktor kirib keledi)
Direktor: - Ey!!! (Qoçegar qarnından tutub stolğa aўadı) Nedi bu etgeniñ!? Meni stolumda sırtıñdan soylanıb ne işleyse!?
Q: - Qarnım aўruy edi.
D: - Üyüñ qurub aўruruq, qarnıñ aўrudu ese, ol halq çabıўçu cerge çabsaña, meni stolumu üsüne catmay?!
Q: - Qarıўum cetmey qalğan edi.
D: - Bılay kelçi! (qoçegarnı iyiskeydi) Tartıb tura bolursa, deyme?
Q: - Da, ol ekibizden qalğançıqnı!
D: - Tohta, anı calağanmısa?
Q: - Calağanma!
D. (Cıları kelgença etib): - İtni qanın calarıq! Cılanlarıñ coq ese, menñe qoymay, anı artına deri qalay "lıq" etib qoyduñ?
Q.: - Da, …bizde entda bir şişa bardı da?
D.: - Qayda!? Ne zat şişa?
Q.: - Da, saў şişa bardı!
D.: - Saў şişa barmıdı?
Q.: - Hı-ı!
D. (Can kirib): - Da, sora men nek olturub turama!? Al beri ol şişanı! (Qaçegar şişanı çığaradı) Hı-ı, hayda quy! (Qaçegar şişanı başın açadı) Hı, sen quya tur, tohta! (Eşik taba qarab) Altınçaç!
Al.: - (Tawuş) Tıñlayma!
D.: - İgi qızça beri tıñla: büğün, qalğan künledeça bolmay, işibiz bir da bir bek qatıdı, menñe adam cibereme deseñ, eşitmegen edim, deme!
Al.: - Añıladım!
D.: - Alay et igi qızça! (Qoçegarğa qarab) Hazır bolduñmu?
Q.: - Hı-ı!
(Rümqaların qollarına aladılı).
D.: - Nu! …Budem!?
Q.: - Budem!
D.: - Adam bol! (Qağışdırıb içedile) Ah-ah-ah-ah! …Qurman bolayım munu çığarğanña! (Zaqusqasın çaynay-çaynay) Endi beri qara Qaracaş: a, üyüñe ol hamamnı müyüşün bir cabar dığalas et deb, nença kere aytama. Aqğan cañur, aram-qaram etmeyin, içine qüwladı!
Q.: - Da, …ne bla cabayım!?
D.: - Endi, igi caşça, alayğa bir köbmü kerekdi: sqladdan bir talay şiferçik al da, cab arı!
Q. (seyirsinib): - Qayda şifer?
D. ¬(Bu da seyirsinib): - Qalay qayda?
Q.: - Cokdu şifer!
D.: - Qalay cokdu? …Qaydadı şifer!?
Q.: - Cüzdürgenek da "nalevo fşi-i-t" deb, kesiñ aythança!
D.: - Tohta anı cüzdürgen edikmi sawlay?
Q.: - Cüzdürgen edik!
D.: - O-o-o-Ollahi, unutub ayta turama, köl kaldı bolma! Kara kağıt bla cabarıq eseñ da cab! Gazet bla üyübüznü cabarğa başlağandıla! …Hı, quy! (Qoçegar quyadı) …Hı, …boldu-boldu! …Nu! …Budem!!!
Q.: - Budem!!!
D.: - Adam bol!!!
K. (İçib boşar-boşamaz): I¬-ı, Sarıbaş, unutub qoya edim aytırğa: …Domalay tsementçik izley edi.
D.: - Domalaymı?
Q.: - Hoў!
D.: - Ollahi tabsız zamanda aytadı da. …Qallay bir izleydi?
Q.: - Üç tonna.
D.: - Az da aytad, sau qallıq. Alay a Domalayğa etmey bolluq tülbüz. Beri tıñıla: "kimni razı etmesek da, seni razı eterme", - deb Sarıbaş teñiñ alay ayta edi, de! Sora esiñde bolsun: Domalayça adamla bla bizge svyaznı kuruturğa çırtdanda bolluq tüldü. Ala bla svyaznı qurutduq - kesibiz quruduq. Tambla oblastha barlıqma da, Allah sen aytsañ da, ol maşinanı beri bururça eterme.
Q.: - I-ı-ı oblastha barlıq eseñ (taўuşun aqırtınıraq etib) …kirpiçle ala kel!
D.: - Ts-s-s! …Qıçırma! (Şıbırdab) Alıwçulanı hazırlağanmısa?
Q.: - Qallay bir süyseñ da!
D.: - Beri qara, Qracaş: men aythan bağadan kapegin tüşseñ, eşitmegen edim, deme!
Q.: - Andan da bağağa barlıqdıla!
D.: - Qallay bir kirpiç?
Q.: - On miñ!
D.: - On miñ kirpiç? Ağı, qızılı da?
Q.: - Başhası coqdu!
D.: - Molodets!!! Adam bola başlağansa! Men seni adam eterikme, degenem da? Adam eterikme! …Nu! …Budem!
Q.: - Budem!
(Qağışdıradıla)
D.: - Adam bol! (İçedile) ...Ah-ah-ah-ah-ah-ah! …Qayda, Qaracaş hayda, endi terk bar da, Altınçaçnı beri menñe çaqır! Bıstro! Hayda!
K. (eşikni qatına cuwuq barıb): - Altınçaç, direktor çaqırad!
(Altınçaç kirib kelib, olturadı)
D.: - Taq! …Munu bla proizvodstvennuyu, noye soveşçaniyunu açama! (Qoçegar bla Altınçaç hars uradıla) …Protoqol soveşaniyu! Caz Altınçaç! …Taq, cazdıñmı?
…Povestka dnya d-d-d-dnü …ı-ı tohta-tohta-tohta, cazma-cazma! Tabsızla zıñırdaydı! …Taq! Povestka …d-d-dnöm, povestka dnöm. I-ı, bu tab caraşadı. Hı, cazdıñmı!
Al.: - Cazdım!
D.: - Caz-caz! …Endi munu artından ol ırğaqnı ilindir! Ol ilindiriwçü ırğaqığıznı ilindir!
Al.: - Zapitoyğamı aytasız?
D.: - Ne, zat?
Al.: - Zapitoyğa?
D.: - Hı-hı, anı ilindir!
Al.: - Sarıbaş, eki toçka kerek tülmü edi?
D.: - Ne zat toçqanı haparın aytadı bu? Men aytdım ese, alayda zapitoydu! İlindir! Cazıb tebre! …Bıltır …bizni …hamamnı …başından …cawum aqğan …beş teşik bar edi. Bıyıl quru eki teşik qalğndı. Üç teşikni camağanbız, başından cañur aqmazça etgenbiz. …Hayda, endi bılayğa ol bıyağında zapasda tuthan eki toçqañı sal!
Al.: - Sarıbaş, bir toçka kerek tülmü edi!
D.(Açıwlanıb): - Ne qayğığa qaldı bu toçqala bla bu!? Ne sağış etgeni bardı munu, a üyüñe, Altınçaç!? Süygenni süymegenni arasında sen da, endi, on klassnı boşağanma, deb turasa! Allay birni biri-birine qalay qıyışdıralmaysa, munu?! Eki teşik qalğan ese, ol eki toçqanı bas da, barma qoy, munu ne sağış etgeni bardı! …İlindirdiñmi?
Al.: - İlindirdim!
D.: - …Kelir cılğa …ol eki teşikni da …başından …cañur aqmazça eterge …qolubuzdan kelirge …bolluqdu. Endi bılayğa soru belgi sal!
Al.: - Saldım!
(Qoçegarnı huruldağan taўuşu çığadı)
D.: - Munña bir qara! Cuqlab tura bolur deyme, üyü quruğan? (Qolu bla silkib) Caş! Caş! Caş!!!
Q. (Qorqub sekirib örge qobadı): - I-ı o-o-allo?
D.: - Tohta-tohta-tohta! Ne allonu haparın aytasa!?
Q.: - Ne deydi?
D.: - Kim ne deydi? Men deyme! Hamamıñ işleymidi, issi suўuñ ceterikmidi, adamlanı carsıўlarına qarayallıqmısa, deb sorsam, cuwab berallıqmısa deyme!
Q.: - Süysele, issi suў, süysele qaynağan suў, süysele suўuq suў!
D. (Hını etib, bileginden eñişke basıb): - Oltur-oltur-oltur arı! …Oltur! (Altınçaçnı qatına barıb, tawuşun aqırtınıraq etib) Altınçaç, tambladan başlab bizge cañı kaçegar izleb başla! Bu bizge carawlu adam tüldü! (Tawuşun ullu etib) …Ekinçi soruwğa köçebiz! Bu bizni hamamda, …bu biletsiz cibergen zatnı, …bu eki-üç cılnı içinde tübü bla quruturğa tırmaşırğa. Ol sıylı borçnu, …hamamnı kassiri Altınçaçnı boynuna salırğa. …Cazdıñmı?
Al.: - Cazdım!
D.: - Munu bla proizvodstvennoye soveşaniyunu cabama! (Hars uradıla) …Endi, canlarım-közlerim, barığız, işigizge qarağız, çırtdanda tarığıw cetmezça etigiz!
Al.: - Sarıbaş qalay ariw söleşdigiz!
D. (Kölü költürülüb, ışara-ışara): - Söleşgençigimi caratıb tura bolursa deyme, Altınçaç!
Al. (Qubulub): - Carathanma.
D.: - Ay, Allah caratsın seni! Molodets, Ollahi! …Altınçaç, qayda, söleşgençigimi da carathansa sora, endi, men da, ne caşırıw, seni bu art közüde, bılay menda seni, ı-ı nemetgença bolub turama, bılay, ı-ı carathança bolub turama degenligimdi, bu işni bardırğanıñı artıqsız da bek. Ollahi, Altınçaç, bu art közüde, bu işni bardırğanıñ bla meni, bılay cüregime cetgenley turasa! Allah aytsa, endi meni mundan arı da, andan da bek kölüme cete turursa deb bek umutçuma.
A.: - Küreşirikme!
D.: - Ay, Allah razı blosun senñe! Ollahi molodets, yey boğu, Altınçaç. …İgi qızça endi, ol da, ol da alay ese, cañız senñe kölüm qalğn bir zat bardı: har quru bılay sınab qarab turğanma da, qaydam tışından, başdan adam kelgen közüde, Sarıbaş, Srıbaş, Sarıbaş, deb bu sarı başha qadalıb turmay, atamı atın da ayta bir tursañ a? Oğese atamı atınmı bilmeyse?
Al.: - Bileme!
D.: - Qayda, bile eseñ, bir aytçı! Qalay aythanıñı bir köreyim.
Al.: - Toqmaq!
D.: - Endi Sarıbaşnı artından Toqmaqnı bir ilindirçi!
Al.: - Oў! …Sarıbaş Toqmaq!
D.: - A üyüñe, adam Sarıbaşnı da Toqmaqnı da bılay qatışdırıb qalay aytadı!?
Al.: - Da üretigiz!
D.: - Da, büğünlü men aytıb küreşgen anañı boza qalağımıdı? Toqmaq ulu, Toqmaq ulu deb turmay, Toqmaqnı uçuna bu "oviç" deb ilindirirge kerekmidi!?
Al.: - A-a, alaymı deysiz?
D.: - Vot-vot-vot endi añılay başlağansa. I-ı, endi ilindir! İlindirda boşa!
Al.: - Sarıbaş Toqmaq ulu!!!
D.: - Ulu, ulu, ulu deb meni ulutur canından bolub turma da, artına "oviç" deb bir ilindir!
Al.: - Sarıbaş Toqmaq uluoviç!
D.: - Nepravilno!!! …Meni atamı atı Toqmaq!
Al.: - Toqmaq!
D.: - Toqmaq!
Al.: - Toqmaq!
D.: - Entda bir kere, Toqmaq!
Al.: - Bileme!
D.: - Da bile eseñ "amma bilgen tıbına" degenley, büğünlü men haribni ulu, ulu, ulu, deb ulutur canından bolub turma da, ol ilindirligiñi ilindirlik ceriñe ilindir da bir boşa!!!
Al.: - Söz üçün?
D.: - Söz üçün! Entda bir kere qaytarama, Altınçaç! Aytalmasañ tambla sen da ketdiñ işiñden! İgi tıñıla: söz üçün ¬- Toqmaq ulu deb meni atımı alnında, atam Toqmaqnı atın salmada, atam Toqmaqnı atın meni atımı artından ilindir, anı uçuna da "oviç" deb ilindir, ilindir da boşa, üyüñ qurub ilindirlik munu ilindirlik eseñ!!!
Al. (Quўanıb): - Bağalı Sarıbaş!!! Oquwum alay ullu balmasa da, Tabsaşarlanı Sarıbaşnı atın, atasını atın da ayta billikme!!! …Sarıbaş Toqmaqoviç!!!
D.: - Soverşenno tübbe-tüz - pravilno boldu da qaldı! Ay, aperim senñe, Altınçaç! Tuwra razı etdiñ meni büğün! Endi mından arı da meni mından da bek razı ete turursa! Endi, endi bar da cumuşlarıña qara, igi qızça! Ay caşağın sen! Bar!
(Altınçaç ketedi) Oğay beri bir tıñlağız: Tabsaşarov Sarıbaş Toqmaqoviç. Bılay kesibizça aytsaq andan da alamat: Tabsaşarlanı Toqmaqnı caşı Sarıbaş! Munu mından arı qayrı zıñıdatırıqsa, qayrı dıñırdatırıqsa. Endi bir içki muratçığımı ayıtıb qyayım sizge: bılay Qaraçay Şaharnı dom sovetini allında, Alley parqamı deyle, ne deyle ol alçılanı suratlarını ortasında, meni da bılay bellimden örgesin bir ilindirsele, sora talay bir zamanña işleni bitgenñe sanarıq edim. Allah aytsa, ol da bolur. (Kesine arakı kuyub içedi)
K. (Eşikden kirib kelib): - Sarıbaş, bu pismonu senñe rayondan iygendile!
D.: - Rayondanmı?
Q.: - Hoў! Qayda bılay ber! (Qoçegar tentireydi) Üyüñ qurmağan, bılay kesiñi qatdır! Qallayla tentireydi adam alay! Oğay, men añılamağan bir zat bardı: adam bılay lüyüldek bolub, qalay qaladı?! Qatdır kesiñi! Meni bılay qatdırırğa küreşib turğanımı körmeymise kesimi! İşni üsünde uşaysada! İgi bişmegen maqoronça, üyüñ qurub! (Pismonu açadı) Taq! "Bağalı Sarıbaş! Senñe bildirirge aşığama" - Domalaydandı - "Qısha zamannı içinde qararğa narodnıy kon…(Esi çığadı) Norodnıy kontrlnı ciberirge onoўlaşhandıla. Baş qayğıñı kör!" - Eşitemise, suў baş! Eşitemise! (Cıları kelib) Narodnıy kontrol kelse, nebizni körgüztürüqbüz, eki qabırğadan sora cuq qoymayın üyge taşığanbız sora? İşlet! Bu başnı işlet! Munu içinden bir aqıl söz çıqsa, üyü quruymudu? (Awur soluydu) Ne etsin adam? (Qağıtlanı qazadı) Qayda, ne boldula bu qağıt kibikle?!
Q.: - Tabdım!!! Tabdım-tabdım!
D.: - Nenii tabdıñ!?
Q.: - Direktordan qağıt - bülleten!
D.: - Ne?
Q.: - Aўruğanıña doqturdan qağıt!
D.: - Doqturdan qağıtmı?
Q.: - Hoў!
D.: - Tohta-tohta-tohta! Ollahi bir zatnı kelişdirgense! …Caşağın!!! Molodets, suўbaş! Molodets! Tambla oğuna bülletenñe çığama. Ma, radikulitim tutdu. Körese, ma radikulitim tutub qoyğandı. Kesimi ornuma direktorluqğa seni qoyama.
Q. (Quўanıb): - Meni?
D.: - Hoў!
Q.: - Men dirktor! Altınçaç!
Al.: - Tıñılayma!
Q.: - Qara, men direktor boldum! Men direktorma!
D.: - Cab awuzuñu, bolmay a sen direktor! Altınçaç, nazad!
Q.: - Süda!
D.: -(Qoçegarnı başından eñişge basadı) Tohta-a! …Beri tıñıla bılay! (Qulağına cuwq iyilib) Direktor bolğan alay tınç işdi, deb, aqılıñ alaymıdı!? Ne!? Men ol orunña olturur üçün, nença carlını üyün quruthanımdan haparıñ barmıdı!? …İgi tıñıla! Oynay tururğa zaman coqdu! Qısha zamannı içinde, endi, bılaydan tas bolurğa kerekbiz! Munda biz eter zat qalmağandı. Tohta-tohta-tohta! Esiñdemidi: Domalay menñe har quru aytıwçan edi? Bılayda qalayda ese da, elleni birinde, uzaq bolmay, "dom kulturı" işlene turadı. Endi alayğa cañı direktor kerek bolub turadı. Añılaymısa!?
Q.: - Hoў!
D.: - Ol a, Domalaynı qolundan kellik zatdı. Endi bılaydan ketebiz! Altınçaçnı da alıb, brigadaçığıbız bla bılaydan ketebiz!
Q.: - Men anda ne eterikme?
D.: - Qalay ne eterikse? Sen mında mende kaçegar ediñmi!? Anda da men seni kaçegar eterik …tülme. Men seni hudruk eterikme!
Q.(Kuanadı): - Men hudruk!? Kalay igidi! (Awazın da türlendirib) Ne zatdı ol?
D.: - Ollahi, kesim da bilmeyme, artda ürene barıbız. …Nu! Karacaş, bılayda aşağanıbızça, kultura frontnu kıyırından kirib aşab tebrerge - alğa!!!

 
Forum (Nığış) » GENEL BÖLÜM » Edebiyat Sanat » Hamamnı direktoru---Bizni tilde tiyatro
  • Page 1 of 1
  • 1
Search:

Copyright Karachay © 2024