TARİHİBİZ KAYDADI?
BİYİ COKNU – ELİ COK!
Kesi milletin, halkın «süymeyme» derik, anı tarihin sögerik, din-tin
baylığından ciyirgennik neda bile-bile ol zatlağa hıyanat eterge izlerik hazna
adam bolmaz. Eterik amanlığı, sallık zaranı taşa kalıb ketmey, tört duniyağa hak
bayam bolluğun bilse va, eşta, allay işni innetinde, cüreginde oğuna «boynun buvarık»
bolur edi… Bolsa da, caşavda, az, köb
bolsa da, künden keçege kesi halkıbıznı ötgen tarihine, kellik kününe da
hıyanatıbıznı cetdirgenley barabız. Tıñsız-toyumsuz zamannı ömürlükge cuthanın
azğa sanağança, cavlarıbız kelib salğan artıklık bla zıraflıknı «caşavubuzda
bolmağanña» neda «ötgen kadarğa» buyurğança, millet ençiligibizge, başhalağa
uşamağanlığıbızğa süymegenleribizni zarlıkların sırtıbızda bılay bir tınç
kötürüb ketellikça, bir tok, bir tınçlıklı, sağışsız, oyumsuz caşav eterge
izleybiz. Aslamıbız alay ete da barabız…
Sözümü nege başlağanma? Belgilisiça, duniyada kaysı bir milletni da ençi
şini, tili, tini da boladı. Alay a kimini tarihi terenirek tintiledi, kimini
ana tili igi saklanadı, birsisini va tin baylığı, tab, büğünñü çeksizlik
(ğlobalizatsiya) caşavda da aynıy baradı. Ol zatla kesleri allarınamı boladıla
eken? Oğese adam kıyınımı, cüzle bla, miñle bla adamlanı kıyınlarımı kerekdi?
Sözsüz da, işlemey, urunmay, tırmaşmay, dığalas etmey bu duniyada bir can da
caşav etelmeydi. Bizni milletibiz da, ne arı-beri bursak da, artık calkav kavumdan
da tüldü. Da sora halkıbıznı tili, tini, tarihi neden kuruy baradıla? Bu cürüş
ala barğan çeksizlik, şaharçılık adet (tüzü, adetsizlik) milletibizni bütev
ençi şartların, kıyğan sürmeça, kabuk-kabuk etib kalay aşab baradıla? Alay
bolğanı va, sokur, sav da körürley, hakdı!
Adamnı (milletni da) etgen işi anı innetinden çığadı. Andan da tolurak
aytsak, etillik işni ağaçlığı innetni terenliginden, demeñililiginden çığadı.
Alaydı da, büğünlükde «ana tilibiz kuruydu!», «tin baylığıbız tas boladı!»,
«tarihibizni urlaydıla!» degença tarığıvladan, tıhsıvladan başha ne etiledi?
Camağat daracada da, kral daracada da har dayım da kuru bu tarığıvlanı
eşitebiz. Alay a bir tolu, tıñılı innet, birikgen (artıksız da, birikdirlik)
oyum barmıdı? Medet, cokdu! Milletni
millet etgen ençi şartlarını biri – anı esidi. Alay demeklik, anı tarihidi. Esi
bolmağan adam serge (cartığa) sanalğança, tarihi bolmağan millet da cokğa
(coldan koşulğanña) sanaladı. Alay ese, Karaçaynı ol-bu cıldan başlab bir-biri
ızından kelgen tarihi kaydadı? Men kesim tarihçi tülme, alay a milletibizni til
haznası bla, avuz çığarmaçılığı bla, tin baylığı bla da bir az şağırey bolğanım
sebebli, bu zatnı üsünden ençi oyumumu aytırğa izley edim. Ters cerimi kerti
tarihçile tüzetirle… Kıtaynı tarihin
bilirge izlesek – anı imperatorlarını tarihlerin okuybuz. Misirni tarihi –
pırğavunlanı dinastiya tarihleridi. Frantsiyanı, İñilizni neda Ereseyni tarihi
– patçahlarını tarihleridi. Arabnı tarihin a halifleni etgen işlerinde
izleybiz. Bizniça, bu gitçerek tav milletlege cetsek a, ne ese da tarih başha
corukla bla cazılıb başlaydı: gunla, alanla, hazarla, kıpçakla, zihle,
bulğarla, asla… Anı da azğa sanağan kavum a şumerleni, ellinleni, türkitleni,
hetleni, kumanlanı, maykopçula, skifleni… «altın halılarından» okalı tarih
tigerge küreşedile. Sözsüz da, bu aytılğan milletle, halkla, türlü-türlü
arheologiya haznalanı iyeleri bizge «cuvuk» cete da bolurla. Alay a barısı da
birge neda birem-birem bizni ençi tarihibizni berelmey esele, karaçay tarih
ilmunu tamalı ters oyumğa tayana bolurmu, ters lağımla bla hayırlana bolurmu,
degen soruv keledi. Bıllay cañılıç bizge
kaydan çıkdı degen soruvğa cuvab da izlemegenley, anı cañılıçlı, zaranlı
bolğanın bayamlav bla koyama. Allay cañılıçnı çurumundan büğünñü sohtalağa,
studentlege Karaçaynı bir keskin tarihin okuturlay madarıbız bolmay turabız.
Alay demeklik, caş tölü kesini millet añısın, esin kurayalmaydı. Kesini karaçaylılığın,
başhalağa koy eseñ, kesi-kesine oğuna añılatalmaydı, anı çeklerin, özegin
belgileelmeydi. Belgilisiça va, milletni birikdirgen, bir colğa salğan, anı
eter işlerin belgilegen, anña özek bolğan anı onovçularıdı, vlastıdı. Endi
bıllay soruvlağa bir cuvab izleyik: Karaçay ençi onov cürütmegenmidi? anı onov
cürütgen kavumu bolmağanmıdı? Bolğandı.
Bek burunladan da bola kelgendile Karaçayda biy törele da, hanla da, biyle da,
oliyle da. Krımşavhalları, Dudaları, Karabaşları, Orusbiyleri – bir koy esegiz,
tört biy tukum oğuna da bolğandı. Alağa deriçi hanlık etgen Terbolatlanı Karçanı,
Budiyannı, Adurhaynı, Navruznu, alağa deriçi hanlık etgen eki Karçanı, nartlanı
tarihleri kaydadı? Aladıla bizni vlastıbız, onovçularıbız, özegibiz – ömürleden
kelgen tarihibiz. Söz üçün, artdağı biy kavumdan
Krımşavhallanı alıb aytsak, ala azı bla 600 cüz cılnı buzmay Karaçayğa oliylik
etib kelgendile. Duniyada köb dinastiya tabarıkbızmı allay bir cılnı kaysı
bolsa da bir kralğa biylik etelgen. Meni sartın, kuru Krımşavhallanı tarihleri
oğuna tintilse da, (ötgen sovet ömürnü da koşa) biz 700-cıllık tarihibizni
erkeletirge bolluk edik. Ol a, iynanığız, az tüldüdü! Büğünlükde tolu, tıñılı krallık
cürütgen milletleni aralarında da bek azısı mahtanallıkdı 700 cılı bla. Belgilisiça, Karaçaynı biy tukumları
ömürleden da honşu milletleni biyleri bla, patçahları bla cuvukluk cürütüb
kelgendile. Krımşavhallanı (birsi biyleni da) tarihlerin Gürcünü, Noğaynı, Türknü,
Krımnı, Dağıstannı, Kabartını, Ermenni emda Ereseyni tarih kağıtlarında,
yevropaçı colovçulanı, alimleni cazğanlarında da tıñılı tabarğa bollukbuz. Ala
alay bolumsuz oliyle bolğan bolsala, ança ömürnü uzağında karaçaylıla da tözüb
turmaz edile, başha milletleden da bizge kaçıb kelivçüle bolmaz edile. Eşta, kesibiznikile
da, başhala da oñsunub turğandıla alanı oñlulukların da, onovların da,
biyliklerin da. «Biylik – Allahdandı»,
«Avuzu kıysık ese da, biyni balası söleşsin», «Biysiz – canazı kılınmaz», «Biyi
coknu – eli cok», «Biysiz çibinleça», «Onov kerekli el kırıldı» degença sözleni
milletibiz karañılıkdan cürütmegendi. Anı aythanım, büğünñü alimle, alanı
üsleri bla büğünñü milletibiz da kesibizni onovçularıbızğa – biyleribizge tüz
bağa, tıyınşlı orun berelmesek, tüz oyum etmesek, bizni tarihibiz bolluk tüldü.
Bizni üçün deb, bütevduniya ilmuğa cañı corukla kiyirmezle, cañı «eşikle» da
açmazla. Kertige tuvra kelir üçün,
bılayda bir aşhı tarihçibizni atın aytırğa izleyme. Talay cılnı mından alğa
Hatulanı (Temirbolatlanı) Raşid, birinçi bolub, kesini kandidat dissertatsiyasın
karaçay-malkar vlastha, anı tintivge coralağan edi. Sözsüz da, cañız
dissertatsiya bla biyleni bütev tarihlerin açıklamaklık tolmazlık işdi. Alimni
allay borçu da cok edi – anı işinde vlastha aslamısına, tüz tarihden ese,
etnografiya, din-mecisuv emda filosofiya közden karalıbdı. Kalay-alay bolsa da,
ol bir alimni birinçi atlamı edi. Kalğan tarihçileribiz a? Cuk işlemeydile neda
gırcınların boş aşaydıla, degenligim tüldü, Allah saklasın. Sovet «gürbecide» bişgen tarihçileribiz aksüeklege,
biylege proletar közden karab, anı üçün alanı büsürevsüz ete edile der edim,
büğünñü caş alimleribiz da «dissertatsiya», «stepen», «zvaniye» kayğılı
bolmasala. Em seyiri va nedi desegiz, tarihçileribiz köb, tarihibiz a – cok!
Alğınladaça da bolmay, kesibizni sav tarih fakultetibiz bardı! Şkolda, vuzda da
millet tarihhe coralanñan ençi dersle bardıla. Tarihibiz a cok! İlmu işle köb –
bu tört biy tukumğa coralanñan bir cañızı va cok! 700 cüz cılnı koy esegiz,
200-300 cılnı bir-biri ızından keltirelgen da cok! Biz biyleribizden
«ciyirgenmey», ala bla öhtemlenirge kerek edik. Tünenegi vlastıbızğa tıyınşlı
sıyın, tüz bağasın bere bilmesek, alanı tarihlerin, künden künñe tas bola
barğan haznaların saklay bilmesek, büğünñü vlastha da ne boysuna, ne anı bla
tüz hayırlana billik tülbüz. Endi kesi
tögeregibizge bir karayık. Cañız bir biyibizge coralanñan, alağa atalğan ne
esgertme, ne muzey, ne bir başha tarih belgibiz barmıdı? Teberdide Krımşavhallanı
İslamnı muzeyi ol zatha artık kelişelmeydi – ol suratçını muzeyidi. Duniyada
«zamokla», «usadbala» degenni aytıb, oyulub, cok bolub boşağan zatların cañıdan
işleb, alanı «esgertme» etib, kesi tarihlerin cazarğa kast etgenleni köre
turğanlayıbızğa, bar zatlarıbıznı neçik saklayalmazbız? Söz üçün, Eski Cögeteyde Krımşavhallanı
(Açahmatlanı Paçanı) kara kancalbaş üyleri büğünlükde da saklanıbdı. Sovet
vlast kelgenli, ne seyir ese da, ol mekyamda kişi da caşamağandı. Milletibiz
köçgünçülükde bolğan cıllada Cögeteyde ayak orunlu bolğan kavum çegetden otun
taşımay, honşu üyleni töñertgelerin otha salıb turğan zamanlada da, Allah saklab,
Açahmatlanı üylerine hıyyanat cetmegendi. Medet, bizni sansızlığıbızğa zaman da
koşulub, muzey bolurğa tıyınşlı mekyam büğünlükde zıraf bola turadı. Krımşavhallanı
Kart-Curtda da bardı (Kıliyan Ayağında) saklanıb kalğan bir üyleri. Eltarkaç
ayağında Açahmatlanı alamat üyleri, ullu terek baçhaları, gara suvları
bolğandı. Üy orunları belgilidi, terek baçhalarından a büğünlükde da talay
terek kalğandı. Belgili cırda aytılıvçu Krımşavhallanı Kanşavbiyni üy biyçesi
Goşayahnı kalası Cögetey özenni başında saklanıbdı. Tögeregibizge karasak,
iynanığız, birsi biyleribizni haznaların da tabarıkbız. Büğünñe deriçi kalay alay boldu ese da, endi
cañılıçıbıznı tüzetir zaman cetdi, tarihibizge sak bolayık, der innet tuvallıkmıdı?
Sözümü allında aythanımça va, adamnı, milletni da, etgen işi anı innetinden
çığadı… _________________ Razıma, razı bol!
Kaynak: http://elbrusoid.org |