Köb zamannı bılayda bayraknı üsünden söz aytıldı. Kimi alay bolsun, kimi bılay bolsun. Boyavu alay, sızgısı bılay. Harkim kölündeğin kölü süygença aytadı. Bayrak algı burun curtnu kuru da cer bolmay curt bolganını belgisidi. Bir halknı millet angısı bar ese cerine iye bolub, alayın curt bilib, anı üçün kazavat etib, kanın tögedi, cavdan koruvlaydı.
Bayrak ızı bıla da milletni belgisidi. Anı miyikge tarthan cerge tüşürmegen milletdi. Bayraknı boyavu, sızgısı, ne da kalgan ceri demengili bolsa da, bolmasa da bolur. Duniyanı em aruv em demengili bayrağın caraştırıb salsang ne bollukdu, kişi tanımasa bilmese?
Bayraklanı bildirgen nedi?
"Bayraknı bayrak etgen üsündegi kandı Anı üçün ölgen bar ese toprak vatandı (curtdu)."
Bayrak milletni angısıdı, birikmekligidi, birbirin süymekligidi, bilimidi, ilmusudu, ekonomikasıdı, kültürüdü, baylıgıdı. Bılanı biri da bolmay duniyada atın aytdıralmagan köb millet bardı, bayrağını kişi da bilmeydi, tanımaydı, ne aruv ne demengili etilgen ese da.
Duniya milletleni bayrakların allıgızga alıgız da bir karagız. Haman közübüzge türtülüb turgan bayraklanı boyavunu da, belgisini da, sızgısını da caratmaganıgıznı körlüksüz. Ala aruvlukları bıla demengili carışdırılgandıla deb tartılmagandıla miyikge. Kesi atların duniyaga aytdırgan milletleni bayraklarıdıla ala. Har milletni baylıgı kesi kültürüne köredi. Kültür baylıgını daracası kallay bir miyik ese bayragı da allay bir miyikdedi. Kalgan baylıgı da anga köredi.
Kültürnü bay etgen, anga caşav bergen "til baylık"dı. Ana tilin süymegen, bilmegen, bilirge izlemegen, söleşirge ıylıkgan bir milletni bayrak nesine kerekdi?
Karaçay kültürnü miyikligin daracasın aytırga meni karıvum da cetmez, fahmum da cetmez. Kesime köre angılarga küreşeme. Men ayaklarımı üsüne tirelir zamanga tavusulub boşagan edi. Bizni el em köb Karaçaylını caşağan ceri bolub, adam sanı köb bolub, Türk kralnı başçıları haman kelib coklay turgandıla. 1960-çı cıllada Cumhurbaşkanları, 1970-çi cıllada Başbakanla elge kelib halk bla uşak etgenley turgandıla. Ol zamanlada men munu angılayalmay köb sağışla etgenem. Türk kralnı başçılarını Karaçaylıla bıla uşak etgenden sora işleri cokmu edi?
Sora nek kelgenlerin bir süzeyik.
Bizni elge cetginçi, alanı közüne körüneyik deb, collaga tizilib, atları bla, arbaları bla, alların tıyarga küreşib, bıla bir kesekni tohtagan kibikni etsele da, biz da bir kereklibizni aytalsak deb turgan adamlanı başçılarını da, valiylerini da, kaymakamlarını da körmezden kelib, bizni elge atlab kelgenlerine ne aythın?
Kelgenleri cukga caramay da kalmağandı. Cerleribizge cer koşhandıla, sabanlarıbızga saban koşhandıla. Elektrik, suv, col, asfaltda algın bizge berilgendi. Karaçaylıla öz bolub, kalganla nek öge bolgandıla? Türk kral har nesi az bolgan zamanda, ençi ülüşün bizge nek kabdırıb turgandı? Ol zamanda adam sanı 2-3 ming bolub turgan bu köçkünçü halk Türk kralnı közüne nek aruv körünüb turgan edi?
"Aladan nebiz başha edi?" degen soruvunu içindedi munu cuvabı. Karaçay kültürnü başhalığın sezgen adamla, kralnı başçılarına Karaçaylılanı haparın aythan edile. Türk kralnı başçıları da közübüz bla köreyik deb kelgen edile. Ansı Karaçaylı kökden tüşmegen edi Türkge. Kelib körüb, söleşib, kallay adamla bolganıbıznı da körüb, har ne zatla bla da boluşhan edile.
Endi karayma da, körgenimi aytırga tilim koymaydı. Ol sıylı halknı, sıylı kültürü tas bolganlı, bizge kişi da burulub karamaydı. Nege kararga kerekdi! Biz alaça bolabız, alağa uşaybız deb küreşgenibiz amaltın, ala da bizden kengden kenge, uzakdan uzakğa ketib baradıla. Ol cıllada kereklibizni üyübüzde konak bolub turgan Cumhurbaşkanına ayta edik. Endi va kralnı tamadalarına koy, odacısına da sözübüz caprakdan arı ötmeydi.
Bu halk nek bıllay bir harib bolgandı. Algın tögereginde caşagan halklanı onovun koy, Türk kralnı başçıları bla birgeley bütev kralga onov etebilgen halk, kesini onovun eter akılın kayda tas etgendi?
Meni sartın akılın tas etmegendi; ana tilin tas etgendi, ızı bla kültürün tas etgendi, ızı bıla da millet angısın tas etgendi. Allah da kereklisin bergendi.