BAGALI KARNAŞLARIM, EGEÇLERİM!
Cañı cıl ogur bla kelsin!
Keligiz, bu Cañı cılda, bu karaçay-malkar saytdan başlab, kayda da, ana tilibizde söleşeyik, cazayık. Başha halklanı adamlarına aytılır zatnı orus, iñiliz, türk tillede da aytayık, kalgan zatnı ua kesi tilibizde bardırayık.
Tilni bilmegen neda karıusuz bilgen ayıb tüldü - ayıb da, günah da tilibizni bilirge izlemegenlikdedi. Bizniça, orus tilge köçüb bargan bir halk cokdu. Honşulaga oguna karagız - çeçen çeçença, iñuş iñuşça, adıg adıgça, nogay nogayça, abaza abaza tilde - aytırga, ullu, gitçe da - har kim kesi tilinde söleşirge küreşedi. Biz a, tilibizni da bile turganlay, orusça cazarga küreşebiz.
Taulu tauluga orusça söleşgen - ayıbdı. Kerek bolmagan cerde başha tilde söleşirge, Sau Tilibizge ırıslayık. Kalgan halkladan bizni başha etgen, halklıgıbıznı körgüztgen - ol Ana tilibizdi. Andan ayırılsak - biz halklıkdan ayırıllıkbız.
Bizni halk bolmasa, Millet Bayragı (Nasionalnıy flag), Millet Tamgası (Gerb), Millet Oraydası (Gimn) bolmagan halk cokdu. Sozub barmay, kelgen cılnı içinde, anı onouun da eteyik.
Kesini tilin koüb, başha tilge köçgenni çöb çaklı bir sıyı bolluk tüldü. Duniya mal üçün, dininden-tilinden-curtundan ayırılgan, alanı auuşdurgan - nasıblı bolluk tüldü, eki dunyadan da ülüşsüz kallıkdı. Allahha tayana, kesibizni kesibiz saklamasak, bizni bir kişi saklarık tüldü.
Bagalı karnaşlarım, egeçlerim!
Allah bergen Hak islam dinibizge, bay türk tilibizge, miyik Kavkaz curtubuzga tıyınşlı bolayık. Tıyınşlı bolayık dinibiz-tilibiz-curtubuz üçün küreşgen, sermeşgen, ölgen ata-babalarıbızga. Alanı küçleri bla, biz hazırga kelgenbiz. Saklayık Allah bergen, nart ata-babaladan bizge köçgen, ala amanat etgen baylıknı - Dinni, Tilni, Curtnu.
Allah bergen Kalamnı, Kitabnı küçü bla, Hak colda barayık, cazıuubuzga ie bolayık, cazıuubuznu kesibiz cazayık. Kara tanıgan, kara caygan Halkladan bolayık. Halkıbıznı tünenesi, bügünü, tamblası da kesibizni kolubuzdadı. Anı unutmayık. Barıbızga da Allah boluşsun.
LAYPANLANI Bilal, Karaçay-Çerkes Respublikanı Halk Poeti, Karaçay-Çerkes Kral Universitetni sıylı doktoru, Milletlearası Türk Akademiyanı sıylı akademigi
Kaynak: http://www.elbrusoid.org |