Ufuk TUZMANNI Bilal LAYPAN bla mülakatı-intervüsu
1.Kesigizni okuvçu kavumğa
tanıtsağız
1. Atım, tukumum –
Bilal LAYPAN. Şimal Kavkazda Yevropanı em miyik Elbrus tavunu – Miñi Tavunu –
eteginde caşağan karaçay (karaçay-malkar) türk-musliman kavkaz halkdanma. Çurum
çığıb, talay cılnı mından alğa Ereseyden keterge kerek bolğan edim. Busağatda
Norvegiyada caşayma. Eki kralnı da vatandaşıma, eki kralnı da cazıvçula
birleşliklerini (Soyuzlarını) üyesime. Menñe sekretarlık etgen, basma işlerime karağan
da – Alandı (caş kibikge aytama –ayıb etmegiz). Orus, iñiliz, norvey, ispan,
türk tilleni bilgeni sebebli, maña ullu boluşluk etedi. «As-Alan»
internet-saytnı caraşdırğan da oldu. Alan universitetde ekonomika fakultetde okuydu,
anası da ol universitetde meditsina ustalıkğa ürenedi. Meni işim – nazmu, hapar
cazıvdu. «Karaçay-Çerkes respublikanı Halk poeti», «Karaçay-Çerkes kral
universitetni sıylı doktoru», «Milletlearası Türk Akademiyanı sıylı akademigi»
meni kalamıma berilgen ullu sıydı. Ol sıylı atlağa tıyınşlı bolğanlay tururğa
kereklisin añılayma. Soy tamırımdan da
bir-eki söz.
14-çü ömürnü ayağında
(1396-1397 cılla) Temir (Timur) Alan kralıbıznı çaçıb, halkıbıznı da cesir
etib, sürüb ketgendi. Otuz cıldan, 1428-çi cıllada, asker başçı Karça, talay kavum
bla sürgünden Ata curtuna kayıtıb, Karaçay kralnı kurayalğandı. Anı birgesine
curtlarına kayıthan kavumlanı başçıları Adurhay, Budiyan, Navruz, Tram
bolğandıla. Ata canım (Laypan) Adurhay kavumdan keledi, ana canım (Semen) –
Tram kavumdan. Ata canım Hurzuk eldendi, ana canım Uçkulan elden. Hurzuk, Uçkulan,
Kart-Curt Karaçaynı bek eski ellerine sanaladıla. Karça kurağan Karaçay kral
400 cılnı (1428-1828) çıdağandı – 1828-çi cıl noyabrnı 2-de, Hasavka uruşdan
sora, orus patçahlık küç bla, zor bla kesine koşhunçu.
Temirni
cesirinden-sürğününden curtlarına kayıtalğan ata-babam, endi halkıbızğa allay kıyınlık
cetmez deb umut etgen bolurla. Alay a, 1943-çü cıl noyabrnı 2-de, kesine Kurç-Stalin
deb atağan İosif Cugaşvili – Sovet kralnı başçısı – karaçay halkğa soykırım-sürgün
etdirgendi, halkıbıznı 580 kesek etib, Sibiriyağa, Orta Aziyağa kuş tügünley
çaçdırğandı. Curtubuznu tav eteklerin, Miñi Tav tiyresin kesini Gürcü
respublikasına koşdurğandı.
14-cıllık
sürğünnü-soykırımnı birinçi eki cılında (1943-1945) akıl-balık bolmağan 22 miñ karaçay
sabiy kırılğandı. Men sürgünde tuvğan, alay a, sav kalğan nasıblı kavumdanma. Men – sürgünden Kavkaz curtubuzğa kayıtırğa
eki cıl kalıb – 1955 cıl aprelni 12-de Kırğızstannı Kok-Say sovhozunu çüğündür
baçhasında tuvğanma. Avur tişirıvlanı da işge sürüb turğanlarını aythanım –
Stalin ölgenden sora da – rejimni-coruknu katılığın körgüztgenligimdi.
14-cıllık (1943-1957)
sürgünde karaçay halknı carımı – caşavun, sav kalğan carımı da – savluğun tas
etgendi. 1957-çi cıl, Hruşçevnu közüvünde, stalinçi sürgünden boş bolub,
Curtubuzğa kayıtsak da, bizni halkğa krallığın – alğın bolğan Karaçay
avtonomiyasın-oblastın – kral büğün da kaytarmağanlay turadı.
Eki kere sürgünden
ötgen karaçay halk, büğün Rossiya kralnı tiziminde, kesini Ata curtunda
caşaydı, alay a, ne dinine, ne tiline, ne Curtuna tolu erkinligi cokdu. Eresey kralnı
büğün da millet politikası – burundan kelgeniçadı, türlenmegendi: vuak halklanı
zor bla, hıylalık bla da – ne amal bla da – cutuvdu, kurutuvdu. Bizni halkğa
cetgen kıyınlıkla kuru türk-musliman halk bolğanıbız üçün da tüldüle.
Curtubuznu arivluğu, tazalığı, baylığı, cer başı, cer tübü haznalarını köblüğü
zar közlü, kara innetli küçleni kesine tartadı. Anı üsüne da Tav Artı bla
çekleşib turğan curtubuznu ullu geopolitika mağanası bardı. İşley bilgenibiz,
bay caşarğa küreşgenibiz da tınçlık bermeydi başhalağa.
Stalin fırğavun bek
ariv bilgendi millet ne bolğanın emda anı kurutur üçün nesine katılırğa
kereklisin: «Millet deb, tarih kadarı alay bolub, uzak zamannı içinde tilini,
dinini, curtunu, ekonomika caşavunu emda kılığını-halisini, adetini –
kulturasını birligini tamalında kuralğan, birikgen kavumğa-camağatha aytadıla.
Ol ışanladan cañız birin tas etse da, halk milletligin tas etib başlaydı...».
Orus patçahlık da,
sovet-kommunist coruk da, ol ışanlanı birin koy, barısın da kurutub
küreşgendile. Büğünñü «demokrat» Rossiyanı da millet politikası amandan aman
bola barğan bolmasa, igi canına türlenmeydi. Alay demek – Rossiyanı millet
siyaseti türlenmese, bılaylay barıb tursa, bizni halknı halklığına bek ullu korkuv
bardı. Dinibizge, tilibizge, ceribizge bek bolmasak, kesibizni saklarğa
küreşmesek – bu ömürde oğuna tas bolub keterge bollukbuz...
2. Kaysı cıllada caza
başlağansız, tvorçestvo colğa kalay çıkğansız emda ol coldan taydırmağan nedi
sizni?
2. Adam nazmu cazıb kalay
başlaydı, nedi aña nazmu cazdırğan? Cañı tillenñen sabiyge nazmu caz deb kişi
da aytmaydı, özge şiyir matallı sözleri bla ullulanı seyisindirgenle boladıla.
Tabiğatnı bir alamatı, keramatı bu da.
Sözleni bir-birine tağıb, bek ertde başlağanma men da. Uşaş sözleni alay
tizib söleşgenimi em bek uşatmağanla üyde atam bla anam bolğandıla. Atam, anam
da burunñu Karaçaynı adamları edile – dinñe, adetge katı adamla. Anam ceti
cılından başlab, ölüb ketginçi, namazın, orazasın koymağandı. 1943-çü cıl, ol kara
gürge sürğün kün, kuru Kuranın alıb çıkğandı colğa – dinñe begimekligi alay
ullu edi. 1970-çi cıllada bolur edi deyme, aşham közüvde bir küçlü cer tebreniv
bolğan edi. Kalğanla «üy oyuladı» deb, tışına çıkdık, anam a, birden eki
bolmadı: petegen lampanı carığında Kuranın okub turdu. Ol – karañılık, carıklık
ese da bilmeyme, özge kesime köb kere aythanma: imanım, dinñe begimekligim
anamdaça küçlü bolsa – köb günahdan, haramdan saklanır edim, köb işimi ahırına
cetdirir edim. Cañız, anam izlegença, nazmu cazğanımı koyub oltururmu edim –
bilmeyme. Sözleri va esimdedile: «Bu kuv, kurğak sözleni bir-birine çalışdırıb
söleşme da, Kuran oku, namaz keregiñi bil. Ahır künüñe cararık zatla bla
küreş». Atam da, 1895 cıl tuvğan adam, bek karşçı edi nazmu cazıvuma. Birinçi
kitabım çıkğanında, aythanı bılay bolğan edi: «Allah degen söz cok ese içinde –
otha at da barma koy». Ne eterik edim, tışımdan nazmu halda söleşivnü koydum,
içimden a atalmadım...
Altı sabiyden men beşinçi bolğanım sebebli, alağa karay,
tıñılay, ullu egeçim Ayşat da boluşa, beş cılımda okurğa-cazarğa ürennñenme.
Andan beri, cazıvçuluk işni koymağanlay keleme. Ullurak bolğanımda, nazmu,
hapar cazıvğa Karaçayda meni bek köllendirgenle – belgili cazıvçula,
jurnalistle Laypanlanı Seyit, Kağıylanı Nazifa, Bayramuklanı Halimat
bolğandıla. Nazifa bolğandı meni Moskvada Adabiyat institutnu şiyir bölümüne okurğa
aşırğan da. Anda okuğanım – duniya poeziya bla, ullu söz ustala bla tanışırğa
da madar bergendi. Alanı içinde Kaysın Kuliyevni ayırıb aytırğa izleyme. Ol
meni nazmularıma ullu bağa bergen bla kalmay, oñlu cazıvçula bla tanışdırğanlay
turğandı, alanı içinde: Çiñiz Aytmatov, David Kuğultinov. Aytmatov a
nazmularıma da, «As-Alan» jurnalıma da, insan hakların caklağan işlerime da bek
ullu bağa bergendi. 2006 cıl talay institut meni Nobel öçge tecegenleri da
Aytmatovnu sözü bla bolğan edi. Türk duniyanı koy, bütev adam ulunu da bek oñlu
adamları – Kaysın Kuliyev, Çiñiz Aytmatov, Oljas Suleymenov meni poeziyama
bergen sıy, ne Nobel savğadan da bağalıdı menñe, ala bla baylamlı bolğanım – kadarnı
ullu savğasıdı.
3. Çığarmalarığıznı
üsünden tolurak hapar aytsağız...
3. Tvorçestvo colum
meni sıydam, tınç bolmağandı. Sovet kral sürgün etgen halklarına ışanmay edi,
artıksız da alanı intelligentsiyalarına. Karaçayda va artıksız da katı edi
kontrol. Karaçay kesi respublika bolmağanı sebebli, Moskvadan alğa, Stavropol
krayğa boysuna edi. Kray a, tırnağın kes desele, barmağın keserge küreşe edi Karaçaynı.
«Busakla» degen
kitabımı Karaçay-Çerkesde cazıvçula Soyuzu üç kere süzüb, zaranlığa sanab,
basmalamaz onov etgen edi. «Kol cazma sotsialist realizmge kelişmeydi; sınıf
közden karamaydı bola turğan işlege; din mağana, din sözle bardıla...». Bu
halda orus tilde cazılğan talay çapraklı retsenziya. Bıllay retsenziyadan sora,
KGB meni çakıra, soruv ete tebregenine ne seyirsiniv. Kaysın Kuliy katışmasa bu
işge, ahırı ne bla boşallığın kim biledi. Karaçayda hak söznü koy, bir tab ak
söznü aytsañ da, bir kavum kara cüreklini koynuna ot tüşe edi, onovda turğan a
– ol kavum edi. Anı sebebli, curtdan ese tışında tınç edi kitab çığarğan da.
1984 cıl SSSR-ni caş
cazıvçularını cıyılıvlarında meni nazmularımı esledile, Kök teñligine
çığardıla, meni cazıvçula Soyuzuna alırğa, eki kitabımı da Moskvada basmalarğa
onov etdile. Sözlerine da iye boldula: orus tilde eki kitabım çıkdı: «Kamen i
Derevo» («Taş bla Terek») emda «Raduğa nad propastü» («Çıñılnı başında cankılıç»).
Andan beri 20-dan aslam kitabım çıkdı, alanı biri da Karaçayda basmalanmağandı.
Tışkrallı tillege da köçürüldüle cazğanlarım. «Başha caşav» degen atı bla nazmu
kitabım norvej tilde çıkdı. «Cañı Ay bla culduz» degen romanım da ispan tilde
basmalandı. Busağatda «Kazavat» degen romanımı şved tilge köçürüb başlağandıla.
Bütev cazğanlarım – ullu kıyınlıkla abızırathan az sanlı halkıbıznı
üsündendile. Eki sürgünden da ızına-curtuna kayıtalğan halkıbız, büğün da –
curtunda caşasa da – caşav-ölüm bazmanda çaykala turadı. Bu halğa biz kalay
cetdik, mından arı tas bolmay caşayallıkbızmı? Men cuvab izlegen soruvla
bıladıla büğün.
4. Sizni oyumuğuz bla Karaçay-Malkar
kulturanı, adabiyatnı, tilni büğünñü turumu kalaydı?
4. Karaçay-Malkar halknı caşavuna bügünden
ullu korkuv cañız sürğün cıllada (1943-1957) tüşgendi. Ol 14 cılnı halk «Kobannı
suvun içib, taşın calab tursak da, kayıtırıkbız curtubuzğa» deb, umut bla caşab
turğandı. Endi va curtunda da curtsuz, tilsiz bola baradı. Söz üçün, Karaçay-Çerkes
respublikada adam sanı bla em ullu halk karaçaylıladıla, em ülüşsüz da
aladıla. Söz adabiyatıbıznı üsünden
barğanı sebebli, karaçay til, adabiyat saklanırçamıdı, aynırçamıdı – bir karayık.
Karaçay tilde çıkğan ne sabiylege, ne ullulağa bir deb bir jurnal cokdu. Karaçay
tilde çıkğan gazetge gazet derge bolluk tüldü – ıyıkda kuru eki kere çığadı, kalınlığı
eki çaprak. Radio, televizion da bir burhu zamannı beredile karaçay tilde berivlege.
Şkollada karaçay til bla adabiyatdan dersleni kalay bardırırğa bilmeydile – 20
cıl ders kitabla çıkmağanlı. Karaçay tilni bilgenle azdan az bola baradıla. Bu
barıvdan barsa, bu ömürde oğuna duniyadan karaçay til kururğa bollukdu. Cılı
elliden az bolğan cazıvçu cokdu. Karaçay tilde cazğan, okuğan da bek korkuvlu
çekge cetgendi. Kral cazıvçulanı kitabların çığarğan adet kalğandı. Cazıvçula
bay adamla tüldüle – on miñ dollarnı töleb, kitab basmalatır karıvu bolğan cokdu.
Anı sebebli, karaçay adabiyatnı büğünñü bolumu «hahay» eterçadı. Bu kıyınlıkla, problemala sovet kral
çaçılğanlı artık da ullu bolğandıla. Kral orus tilden kalğan tilleni san
etmeydi. Tilni, adabiyatnı – aytırğa, millet kulturanı saklavnu, aynıtıvnu
millet respublikalanı keslerine koyğandı. Millet respublikalada va – Karaçay-Çerkesiyaça,
bücetleri karıvsuzlada – açha azdı. Anı sebebli, millet kultura öle turadı. Halknı
kulturasına, halklığına kayğırlık adamnı millet ayırıb, saylab, tamada
etalmaydı – respublikağa başçını Moskva saladı. Alay bla halknı kesine tamada
saylarğa da erkinligi cokdu. Kralnı politikası vuak halklanı ne kadar ceñil
cutuvdu, assimile etivdü. Karaçay halknı tiline, kulturasına da bek ullu korkuv
tüşgendi. Bıllay bolumda, millet kesi-kesin eskerib, tilin, kulturasın saklarğa
küreşmese, aythanımça, bu ömürde oğuna karaçay halk orusnu içinde erib, tas
bolub keterge bollukdu. Kele turğan palahnı esleb, büğün bütev intelligentsiya
örge kobmasa, tambla keç bollukdu. Allay sınav zaman kelgendi – halkın ölümden kutharıv
har bir adamnı borçudu. Cazıvçulanı va artıksız da. İmam hak sözü bla, cazıvçu
da ak sözü bla adamnı añısın-esin kozğab, halknı ölümden kutharırğa bollukdula.
Adamlık, aydınlık sınalğan bir közüvdü büğün.
5. Tavlu adabiyat duniya maydanında tıyınşlı ornun alalamıdı? Karaçay-Malkar
cazıvçulanı fahmu daracalarına, çığarmalarına ne derge bollukdu?
5. Karaçay-Malkar
adabiyat büğün kıyın bolumğa tüşgenlikge, duniya bilirça, oñlu cazıvçularıbız
bar edile, bardıla. Em birinçi Semenlanı Cırçı Sımayılnı aytırğa kerekdi.
1936-çı cıl ol SSSR-ni halk cırçılarını erişivünde barından da oñlu bolub,
birinçi orunnu alğandı. Alay a, Sımayıl, ullu Cırçı bolğanıça, ullu da Poetdi.
Hov, karaçay halknı ahır halk Cırçısı emda birinçi millet Poetidi Semenlanı
Sımayıl. Karaçay-malkar poeziya Möçülanı Kyazim haci bla Semenlanı Cırçı
Sımayılnı imbaşlarında turadı. Atları duniyağa belgili bolurğa tıyınşlı cazıvçularıbız
da bardıla: Bicilanı Ashat, Laypanlanı Seyit, Batçalanı Mussa, Kağıylanı
Nazifa, Bayramuklanı Nina, Bağatırlanı Şahriza, Orusbiylanı Fatima, Çıpçıklanı
Boris, Babalanı İbrahim, Begiylanı Abdullah, Ölmezlanı Muradin... Bılanı
çığarmaları başha tillege köçürülsele, halkıbıznı duniyağa tanıllığına sebeb
bolluk edile.
Biz – karaçay-malkar musliman kavkaz
halk – türk duniyanı bir parçasıbız. Büğün bizni dinsiz, tilsiz, curtsuz etib
küreşgen kara küçle bardıla. Malkar halknı aksakalları altı aynı Moskvada açlık
grev etib, halkıbızğa cete turğan kıyınlıknı Rossiyanı başçılarına eşitdirirge,
bildirirge izlegendile. Özge, Moskva alanı körmegen kibik etib koyğandı.
Rossiyanı İlmula Akademiyasını akademigi, milletökül Mihail Zalihanov da aytır
kerekli koymaydı bizni halkğa cetgen palahlanı. Anı aythanı da çaprakdan
ötmeydi. Türk krallanı başçıları Orus kralnı başçılarına karaçay-malkar halknı
problemaların bir bildirsele igi bolluk edi. Karaçay-malkar halk ne deydi?
Rossiya zakonların toltursun deydi. «Sürğün palahnı sınağan halklanı hakların kaytarıvnu
üsünden» Rossiyanı zakonu, cerni üsünden 131-çi federal zakon, Rossiyanı
Anayasa Mahkemesini onovları – alanı biri da tolturulmaydı. Ma anı üçündü karaçay-malkar
türk-musliman kavkaz halk Stalin kuruthan krallığın ızına alalmay turğanı,
dinin, tilin, curtun da tas ete barğanı. Türk kralla krallıkları bolmağan vuak
türk kavumlağa boluşluk etmesele, türk ayrımkanlanı teñizle cutarıkdıla. Türk
duniya da allay birge az, karıvsuz bollukdu. Türk duniya birikmese, türk kavumla
bir-birin coklamasala, tamblabız bek kıyın bolurğa bollukdu. Azan kıçırğança,
bu zatnı aythanlay tururğa kerekbiz. «Birlikde – tirilik» deb, ertde aythandıla
nart ata-babalarıbız
Kaynak: http://www.elbrusoid.org |