| tinibek | Tarih: Perşembe, 07-01-10, 9:18 PM | Mesaj # 1 |
Özel
Grup: Admin
Mesaj: 2
Ödüller: 0
İtibarlarınız: 0
Konum: Dışarıda
| 1.Bölüm
Минги Тау
My WebPage
Сен кёкге джете мийиксе
Кавказ тауланы ичинде.
Мияла кибик, джылтырай,
Къанга бузларынг юсюнгде.
Юсюнгде барды акъ тонунг,
Сен джай да, къыш да киесе.
Кюн бузулургъа тебресе,
Боран этерге сюесе.
Кюн ариу, чууакъ тургъанлай,
Тохтамайды боранынг,
Джай да, къыш да эримейди
Юсюнгдеги бузларынг.
Тёгерегингде тогъай отлайла
Алтын мюйюзлю кийикле.
Сени тёппенге чыгъыучандыла
Бёгекле бла джигитле.
Кийик бууларынг ёкюредиле,
Къонгурауланы къакъгъанча,
Джугъутурларынг турушадыла,
Атлыла чарсха чабханча.
Къапланларынг, асланларынг
Бугъойларынга кирелле.
Покунларынг, гуждарларынг
Адам джыйынны билелле.
Аюлеринг мурулдайдыла
Шындык чегетни ичинде.
Бёрюлеринг къалкъыйдыла,
Къойланы кёре тюшюнде.
Кёк джашнаса, сызгъырадыла
Этеклеринг, джел эте...
Менден кючлю джокъду деб,
Кесинг кесинге кёл эте.
Къапланларынг къараб туралла,
Беклеге кириб, мынгайыб.
Борсукъларынг, тюлкюлеринг
Джууукъ барыргъа уялыб.
Къанкъазларынг къангкъылдайла,
Чын тауукъларынг джырлайла.
Къаргъаларынг къаркъ-къуркъ эте,
Мыллык табмайын джылайла.
Кёгюрчюнлеринг джюуюлдейдиле,
Кюнюнг джылтыраб къакъгъанлай.
Маралларынг отлайдыла,
Гелеу кырдыкга батханлай.
Чыпчыкъларынг, чаукаларынг
Будай ындырны чёблейле.
Арарат бла Казбек тау
Санга тюгел джетмейле.
Уллу къушла санга къонсала,
Юйле кибик, къарашыб,
Джур текеле джыгъылсала,
Сюрюулеринден аджашыб.
Кюз артында турналарынг
Аууб кетелле тенгизге.
Къышха хазыр болугъуз, деб,
Эсгертиученсе сен бизге.
Сенден сора къайсы тауду
Ариулукъ бла бай болгъан.
Башы къыш болуб, бели джаз болуб,
Этеклеринде джай болгъан?
Минги Тау бла Казбек тау,
Арагъыз ариу джибек ау...
Сен кийиз бёркню агъарта,
Этегинг джашил къатапа.
Сен джулдузлагъа джанаша,
Къалгъанла сенден алаша.
Бир-биригизге къараша,
Къалай сейирсиз, тамаша!
Бузну, къарны джыйыучу,
Башынга булут къонуучу.
Тёгерегинге басыныб,
Таулула къараб тоймаучу.
Къыш айланы бораныса,
Джай айланы салкъыны.
Джумушакълыкъ этмесенг,
Инджитириксе халкъынгы.
Кесин бегитмей чыкъгъаннга,
Башха болмай, бир джауса.
Сау дунияны башында
Эм белгили бир тауса.
Джырчы Сымайыл"
(халкъ атагъан атым)
Чыкъдым кёклеге, учунуб, учуб,
Мийикден къараб, дунияны кёрдюм.
Мен эшитмеген таууш къалмады,
Джашаугъа: "Сейир-тамаша!" - дедим.
Манга келгенед аллай бир кёзюу:
Джумлай аламгъа айтдым сёзюмю,
Къарачай тилни сыйлы этдирдим,
Къарачай джырны кенгнге эштдирдим.
Алай, не келсин, джазыу буюрду -
Учхан къанатым, сыныб къуюлду.
Бош ышаннганем джазыу джибине -
Тёнгереб тюшдюм аякъ тюбюне.
Мен - шайтан джелде бурулгъан зыгъыр,
Джазыу тирменде эзилген бюртюк...
Къыйыным - халал, кесим а - харам,
Бырнак этдиле кючлюле, тюртюб.
Бир кёл басханым джаб-джангыз бир зат:
"Джырчы Сымайыл" - халкъ атагъан ат.
Ёлюб кетсем да, ол атым къалыр,
Халкъ ауузунда джырым сакъланыр.
Ана тилим
Тил, дегенинг, адам джанны башха джандан
Сыйлы этген,
Тил, дегенинг, хар инсанны билим бериб,
Алгъа элтген.
Тили болгъан бу дунияны патчахыды,
Тёрюндеди.
Болмагъан а, баш баулуду, хайуанны
Кеминдеди.
Джигер халкъым, тил байлыкъны сен
Эртдеден уулагъанса,
Джерден, суудан, ауаз джыйыб, кескин сёзле
Къурагъанса.
Ол сёзлени чарпытмайын тёлюлеге
Джетдиргенсе,
Бизге бюгюн "ана тил" деб, учунурча
Этдиргенсе.
Къайтхан кюн халкъыма
Онтёрт джылны джер тырнакълаб джашагъан,
Джыламукъ бла гырджынны тенг ашагъан,
Сарнайса сен, тау джуртунгу ийнакълай,
Джарлы халкъым, ой, джаралы Къарачай!
Адамларынг Азияда къалдыла,
Джюреклеге кетмез ауруу салдыла,
Къабырларынг къум тюзледе сынсызлай,
Уланларынг къазауатда ызсызлай.
Ол джыллада джан бергенле къайтмазла,
Тауларына тансыкъ салам айтмазла,
Махар суудан бауурланыб ичмезле,
Саула этген бу кюулени эштмезле.
Ол джылланы къан ызлары кеберле,
Аллах айтса, уланларынг джетерле.
Сен джырларса, тауларынгда алгъынлай,
Джарлы халкъым, ой, джаралы Къарачай!
Ёлгенинге джандет юйню багъышлай,
Сауларынгы джашау джолгъа алгъышлай,
Мен айтханча, джыламугъунг джылтырай,
Айт Орайда, ой, джаралы Къарачай!
Сымайыл къайытды джерине[/b]
Мен Семенланы Семенме, дейме,
Чыдамым бла эменме.
Бек ашыкъ болуб, бек тансыкъ болуб,
Шам Къарачайгъа келгенме.
Сен Семенланы Семенсе, дейле,
Менден джыр, оюн излейле.
Чачылгъан джуртха басыннган адамла,
Меннге кёз ач деб, тилейле.
Мен да, сенича, биреулен, алан,
Бу джарлы халкъны - уланы.
Мен да, сенича, ийнаналмайма,
Керти кёрдюм деб, тауланы.
Джюрек тыхсыса, ауаз чыкъмайды,
Тамагъынг къысыб, бууулуб.
Бюгюн Сымайыл джыр айталмайды,
Кёзден джыламукъ къуюлуб.
Ана бла бала тюбешген кибик,
Джурт халкъы бла тюбешди.
Сау онтёрт джылны басдырыб тургъан
Джылыуун бизге юлешди.
Джюреги тыхсый, кёзлери тола,
Тойла этеди Къарачай.
Бу къайтхан кюнню, бу къууанч кюнню
Саулай дуниягъа айгъакълай!
[b]Хурзук, 1957
Кёл басама
Бюгюн ауруу кючлегенди санымы,
Къутулургъа, эшда, болмаз мадарым.
Къаты сагъыш айландыргъанд башымы,
Кёрюннгенди аджашдырмаз къадарым.
Ёмюр деген кюч сынагъан тик джарды,
Ким насыблы къарар аны башындан?
Мен табмадым чыгъар джолну - ол хакъды -
Джыгъылдым да, къобалмадым джангыдан.
Джашауумда кёб къыйынны сынадым,
Инджиу чекдим, табылмайын керегим.
Инша Аллах, учуз болмад муратым,
Болмад учуз тюзлюк тутхан джюрегим.
Терсни-тюзню, элек кибик, себелей,
Заман кеси мухур салыр джаулагъа.
Зарлыкъ джетиб, сёз кёлтюрюб кетгенле,
Эштилинирле энтда джерде саулагъа.
Ким болса да, мени атыма ойлатыр,
Мени сёзюм, джюрегине байланыб.
Мени джырым Къарачайда айтылыр,
Миллетими ауазына сайланыб.
Бюгюн ауруу кючлегенди санымы,
Къутулургъа энди джокъду мадарым.
Тюз джашауум таза сакълар атымы,
Туудукълагъа джетер керти хапарым.
1981
Мыдах сагъатда
Джаш ёмюрюм, джангкъылышча, джылтырай,
Къарт ёмюрюм, балыкъ кибик, къалтырай.
Умутларым - джети кёкню джулдузу,
Джашауум а - къыш кечени мутхузу.
Кюч табмадым, мийик кёкге учмадым,
Джулдузланы миллетиме чачмадым,
Мугур болгъан джюреклени ачмадым,
Зар уясы - бу джерледен къачмадым.
Туугъан джерден къайры къачхын, таш атыб?
Ётюрюкню къалай айтхын, бет сатыб?
Сатлыкълагъа кёзбау джырла этмедим,
Аны ючюн муратыма джетмедим.
Сары атым
Сары атым, джаллы азыгъы болгъан атым,
Не эсе да эсге келди эски атынг.
Акъджал, дейем, мине тебреб джасандырсам,
Акъджал, дейем, тойда, чарсда айландырсам.
Айтханымы эте эдинг, бирин бузмай,
Бир кере да къалмагъанма, санга базмай,
Кёб джоллада джюрютгененг, сыртынг талыб,
Бир кере да сындырмайын, артха къалыб.
Бюгюн сени ол сыфатынг эсге келди:
Тик сенчадан анам хариб бизге энди,
Мени аллымда сен тесукъа этдинг тамам,
Бизге къараб ышарылды сора анам.
Уяу болдум. Сагъыш этдим. Хошлукъ табдым.
Тюш къоркъууун сабийледен кери атдым.
Джораладым: сени керти джаллы сойду,
Мени уа зар, адам бетли бёрю джойду.
Къадарыбыз, ушаш болуб, экибизни
Аны ючюн кёрдюм сени, бир ишексиз.
Джаллы азыгъы мен да болдум, ажым этдим,
Къыйынлыкъны бир тюрлюсюн джырыб ётдюм.
Сары атым, сен термилмей ёлюб кетдинг,
Мен, сау къалыб, ёлюк кибик, джашау этдим.
Тилчи тили аягъыма кишен салды,
Атлатмайын джашаууму кючюн алды.
Кетген кюнлени эсге тюшюре
Бар эди джазым, халкъны къаратхан,
Бар эди джайым, миллет джаратхан.
Энди къач келди, "алтынчач" - аты,
Сууукъ - джангуру, джеллери - къаты.
Чегет тешине, суула таркъая,
Кюн къысха бола, джылыу азая...
Къачны джюрюшю сагъыш этдире,
Къыш ауангысы къоркъуу джетдире.
Чапыракъ уча, джер къуу-шуу бола,
Джюрегими да мугурлукъ ала,
Кетген кюнюмю эсге тюшюре,
Алай бла джаныма себеб келтире.
Эй, джазым, джайым мен джетмез джерде,
Къач бла къыш а - къатымда - тёрде!..
Сагъыш этгеним - мени къанатым!..
Эсге тюшюрюу - къууанч сагъатым!
Ахыр кюнюм
Ёмюp ётдю, джилтин учхан тёрелей,
Джазыу онглуд, бузну джаргъан кемелей,
Къайыгъымы бели - джамау, джаны - джокъ,
Мындан ары толкъун джарыр кючю - джокъ.
Къол кереме, джюзалмайма, не этейим?
Къыйналама талпыугъа кюч джетмейин.
Джаш ёмюрюм - джангкъылычны чырагъы,
Къарт ёмюрюм - Минги Тауну тарагъы.
Джаш кюнюмде джазыугъа бой салмаучанем,
"Къартлыкъ" деген сёзню эсге алмаучанем.
Хорлам алыб чыгъыучанем эришде,
Учхан къушча, джити эдим хар ишде.
Энди уа бой салдым "къартлыкъ", дегеннге,
Кёб турмайын ол джатдырыр джегеннге.
Кёб турмайын кёзкёрмезге кетерме,
Къарачайгъа осиятымы этерме.
Сау къал энди, ой, джарлы миллетим!
Аллах берсин санга сыйлы хурметин!
Ёлгенингден къошулгъанынг кёб болсун!
Кюуден эсе, къууанч джырынг кёб болсун!
Къайгъы сёзюнг алгъыш сёз бла джабылсын!
Хар юйюнгде къарачай сёз айтылсын!
Къабыр топракъ тау этекде табылсын!
Сыйлы атынг сау дуниягъа айтылсын!
Анам
Ата деген, Минги Таугъа миннгенлей,
Ана деген, дарий, дамха кийгенлей.
Кюнюм батды джарлы анам ёлгенлей,
Джулдуз атлы, балдан татлы, ой анам!
Билмегенлей, кёчюрюрге бардыла,
Сормагъанлай, машинагъа салдыла.
Эки джашынг эки джерде къалдыла,
Джулдуз атлы, балдан татлы, ой анам!
Кимле чачдыла Семенлада къалангы?
Кимге айтайым джюрегимде джарамы?
Къайда къойдум акъ сют берген анамы?
Джулдуз атлы, балдан татлы, ой анам!
Ой, Къарачай, къуш тюгюнлей, чачылды,
Бар палахны башы бери ачылды -
Джарлы миллет Азиягъа атылды,
Джулдуз атлы, балдан татлы, ой анам!
Ата деген, ашхы ишге талпытхан,
Ана деген, кёкню, джерни танытхан.
Ёлюм деген, хар джюрекни ачытхан,
Джулдуз атлы, балдан татлы, ой анам!
Ата деген, ёмюр юйню ачхычы,
Ана деген, джашауунгу басхычы,
Ёлюм деген, джашагъанны ачысы,
Джулдуз атлы, балдан татлы, ой анам!
Ата деген, накъут-налмаз къалады,
Ана деген, джанынга джан салады,
Ол джашауну бир насыблы табады,
Джулдуз атлы, балдан татлы, ой анам!
Тогъуз айны ау тюбюнде кёлтюрдюнг,
Къайын ата, къайын ана къолунда,
Кече-кюн да гёзет этген джолунда,
Джулдуз атлы, балдан татлы, ой анам!
Эки джылны акъ сютюнгю ичирдинг,
Ёшюнюнгю тёшек этиб, ёсдюрдюнг,
Алай эте, талай джылгъа джетдирдинг,
Джулдуз атлы, балдан татлы, ой анам!
Отха иймей, суугъа иймей сакъладынг,
Юй кёгюрчюн къанатларын джабханча,
Белляуунгда сени алгъыш сёзлеринг,
Джангкъылычдан нюр таякъла къакъгъанча.
Кёк памилден кёлек, кёнчек этгененг,
Къаназирден къаптал этиб кийдирдинг,
Эркелете, хар адамгъа сюйдюрдюнг,
Джулдуз атлы, балдан татлы, ой анам!
Джети джылда окъуу-билим алдырдынг,
Ишлей-ишлей санларынгы талдырдынг,
Джашачы деб, тоханала салдырдынг,
Джулдуз атлы, балдан татлы, ой анам!
Таугъа чыкъсам, таш аджалдан, титиреб,
Малгъа кетсем, садакъала, кёлтюрюб,
Бушуу, къайгъы джюрегинге келтириб,
Джулдуз атлы, балдан татлы, ой анам!
Элден энчи ат атаенг атыма...
Джанауалда мен болмадым къатынгда…
Джаш тюрсюнюнг агъармагъан чачынгда…
Джулдуз атлы, балдан татлы, ой анам!
Къулагъыма сууукъ салах тартылды,
Джулдуз ананг ёлгенди деб, айтылды,
Джюрегиме джюрек ауруу къатылды,
Джулдуз атлы, балдан татлы, ой анам!
Къайда къалды харекетинг, малларынг?
Ишлей-ишлей талчыкъмагъан санларынг?
Джюнню джибек этген алтын къолларынг?
Джулдуз атлы, балдан татлы, ой анам!
Атам эсе, Бейтуллахда ёлюбдю,
Анам эсе, бир мусафир шейитди,
Нек джылайма, кимден да не келликди?
Джулдуз атлы, балдан татлы, ой анам!
Джыллыкъ джолдан келир эдим кёрюрге,
Санга, анам, олджан салам берирге,
Разылыгъынгы алыб ёлюрге,
Джулдуз атлы, балдан татлы, ой анам!
Къарачайда къабырынгы табсамед,
Зияратха Азиягъа бармазем,
Былай болуб къаллыгъымы мен билсем,
Джан бермейин, айырылыб къалмазем.
Бу дуниягъа туумай къалгъан мен болсам,
Сени ёлген ачыуунгу билмезем,
Къазах элде къабырынгы кёрмезем,
Джулдуз атлы, балдан татлы, ой анам!
Кёр узакъды, тура-тура безерсе,
Уллу Аллахны буйругъуна тёзерсе,
Махшар кюнде, ой балам, деб, излерсе,
Джулдуз атлы, балдан татлы, ой анам!
Кюн садакъа мени санга беририм,
Аллах айтса, махшар кюндю кёрюрюм,
Къазах элде къалды, хариб, ёлюгюнг,
Джулдуз атлы, балдан татлы, ой анам!
Кече ёмюрюм бир къарангы тёбеди,
Кюн ёмюрюм джюзюб кетген кемеди,
Ёлюм деген, хар адамгъа тёреди,
Джулдуз атлы, балдан татлы, ой анам!
Акътамакъ
Сууну бойнун ойнай келеди
Бир ала чабакъ, кёк чабакъ.
Эй! Шам Семенлада келин болгъаед
Мени сюйгеним да Акътамакъ.
Махаралада уа кёксюл кёгюрчюн а,
Салыб, Семенлагъа келгинчин,
Эй! Джюрек аурууум а джокъ эди мени,
Ариу Акътамакъны да кёргюнчюн.
Секириб миндим да атыма, деймен а,
Былай джууукъ олтур къатыма.
Эй! Анисат дерге уялгъан этеме,
Акътамакъ атадым да атынга.
Мин, Акътамагъым а, пайтоннга, дедим а,
Тартыб барайыкъ Махаргъа.
Эй! Ойнай-кюле келирбиз, къоркъма,
Семенланы эски да шахаргъа.
Шам Семенлада уа шаптал терекле да,
Нюрлю бетинге кёлекке.
Эй! Проба салдырыб ишлетгенме,
Санга акъ кюмюшден да челекле.
Шам Семенлада инген алысын,
Джылына джети чалынсын.
Эй! Мени сенден сора джокъду сюйгеним -
Атыб къойгъанман да барысын.
Мин, Акътамагъым а, пайтоннга, дейме,
Чалыб тутайыкъ къолланы.
Эй! Къаяла чачыб, кесим ишлегенме,
Пайтон джюрюрюк а джолланы.
Мин, Акътамагъым а, пайтоннга, дедим а,
Тартыб барайыкъ базаргъа.
Эй! Сени джети таракъ чачынгда, дейле,
Мени бухар бёркюм а башымда.
Mин, Акътамагъым а, пайтоннга, дедим да,
Сен, джулдуз кибик, джарытыб,
Эй, бериста сайын байракъ берликсе,
Чабхан атланы да, арытыб.
Мин, Акътамагъым а, пайтоннга, деймен,
Акъырын элтирбиз, джортмайын.
Эй! Санга чюйре сёз ким айталлыкъды,
Мен эсенликден а къоркъмайын?...
Мин, Акътамагъым а, пайтоннга, деймен,
Алимат да болур нёгерге.
Эй! Джыйырма пайтон заказ бергенме
Сеннге бир кюннге да джегерге.
Таулада тогъай а салмасам, деймен,
Тюзде пайтон бла бармасам.
Эй! Ёлюб кетсем, эки джыларсыз,
Ол акъ маралны да алмасам.
Мен кюнден тилей а барайым, дейме,
Cангa салкъын булут алайым.
Эй! Джерде азмычла ашарла сени,
Хауада мекям салайым.
Сени Кюнчыкъгъандан а бир кёрюр ючюн а,
Салыб Айбатханнга барырем.
Эй! Ол алтын чачынг акъ болса да,
Бир майрышмайын да алырем.
Ой, къызны барды да къыркъ джаны, дейле,
Тилеб, бирин меннге берирменг.
Эй! Мен балта тутмаз къарт болсам, дейме,
Сен эринмейин а келирменг?
Тюлкю бла турна уа шох элле,
Ала суу къамишде къош элле.
Эй! Сюйген бла заман биздеди ансы,
Къалгъан айтханла да бош элле.
Суусар Сууардинни къалай хорлады?
Орча этерге адам болмады.
Эй! Бизни къара шайтан къаргъады, дейме,
Бир нюзюрюбюз да толмады.
Мен суугъа сюек да атханлай, деймен а,
Артындан, эгер чабханлай.
Эй! Сени себебли, мен ёлюб кетсем,
Эки кёзюм санга да къатханлай.
Къайыкъгъа къаплан миннгенлей, дейме,
Къамагъа бычакъ такъгъанлай.
Эй! Джазыуунг болса уа, келиб къаллыкъса,
Джалан аякъ, чабханлай.
Сууну анасы уа Сууардин, дейле,
Ол суу тюбюнде бугъады.
Эй! Сюймеклик сингнгенд назик санлагъа,
Джиликлериме да джугъады.
Ай, тюлкю чыкъды да аллымдан, дейме,
Аны тюгю къызыл къанындан.
Эй! Мен Акътамакъны сюеме, тенгле,
Аллах салгъан джанымдан.
Санга улан тууса, мен алай кёрюрме,
Къаратоннга тулпар туугъанча.
Эй! Джибек къашларынг, джохар чачларынг -
Шамшерде чилле да бургъанча.
Мин, Акътамагъым а, пайтоннга, дейме,
Алтын отоучукъ, юй кибик.
Эй! Мен сол джанынгда да ойнай келирме,
Къабартыдан келген да бий кибик.
Мин, Акътамагъым а, пайтоннга, дейме,
Сен, джарыкъ толгъан ай кибик.
Мен сол джанынгда ойнай келликме,
Къарачайда кюпсе да бай кибик.
Мин, Акътамагъым а, пайтоннга, дейме,
Oнг кёзюм кибик, джан кибик.
Эй! Мен сол джанынгда да ойнай келликме,
Къырымдан келген да хан кибик.
Мин, Акътамагъым а, пайтоннга, дедим а,
Сен - гокка ханслы биченлик.
Эй! Сен - джашнаб турлукъ, азмаз ариулукъ,
Мен - Минги Сууун да ичеллик.
Уллу Шемишерде да чилле сюргенме да,
Урчукъну къолгъа алгъаенг.
Эй! Алтын суу агъачынг, кюмюш челеклеринг -
Апсынла бла суугъа да баргъаенг.
Уллу Шемишерде чилле сюргенме да,
Саяу къолларынга сайларгъа.
Эй! Мени джарлыракъгъа тергейсе, ансын,
Джууаб берлик эдинг да байлагъа.
Гюрджюде гёзюр да ойнайла, дейме,
Эбзеде къозу къыркъыла.
Эй! Кюн тийген ариу а, къайдан келесе,
Мамукъ тау кибик а сытыла?
Шамсунну сары да тюлкюсю, дейме да,
Джандетден зем-зем бюркюлсюн.
Эй! Бизни джазыуубуз бир болуб, алан,
Ой, санга некях этилсин!..
Сен - Къыбла-Тауну да алтын байрагъы,
Мен - ортасында къуругъу.
Эй! Ананг Сырмахан1 болгъа эд, алан,
Анам Джулдузханны2 джууугъу.
Сен - Къыбла тауну да алтын байрагъы
Мен-ортасында къуругъу.
Эй! Анам Джулдузхан болгъаед, алан,
Ананг Сырмаханны да джууугъу.
Ой, Къыбла Тауда уа алтын самауар,
Семенлагъа алыб, ким ауар?
Эй! Сен акъ богъакълы, марджан мынчакълы,
Эй! Сенден ариу да къайда бар?!
Сурахай, сары джаулугъунг, деймен а,
Ариу джарашады санынга.
Эй! Ингилик саласа деб, эришген этелле,
Сени Аллах берген къанынга.
Сурахай, сары да джаулугъунг, дейме,
Аны кюе къыркъсын чачагъын!
Эй! Шам Семенлада уа сен, келин болуб,
Отоу юйде болсун да ушагъынг.
Сурахай, сары уа джаулугъунг, деймен а,
Тамам ариулукъду байлыгъынг.
Эй! Мен - къылсыз къармакъ, сен - алтын чабакъ, -
Сен манга къайдан а табылгъын!..
Ёлтюрме мени уа этген антыма да,
Былай джууукъ олтур къатыма.
Эй! Анисат дерге уялгъан а этеме -
Акътамакъ атадым да атынга.
Архызда алты юй да, юч гёзен, деймен а,
Джашагъан джеринг - тар ёзен.
Эй! Мени ёллюгюм сени юсюнгдеди,
Сени ёллюгюнг да - зар кёзден...
Сарытюзде принч сабанла, деймен а,
Нечик ормайдыла аманла?
Эй! Чачынгы тараргъа, къашынгы сыларгъа
Мен келтирликме да дарманла.
Манахлада клиса, деймен а,
Аны къонгурауу къагъылса.
Эй! Келин боллукъса шахар Семенлагъа,
Джаратхан Аллах буюрса.
Эртденбла эртде тебредим, дейме,
Теберди таугъа ёрледим.
Эй! Таулу къызланы ичинде, дейме,
Мен санга ушагъан да кёрмедим.
Джазлыкъда джангур а джауады, дейме,
Дууутда кюмюш багъады.
Эй! Алыб алалмай, къоюб къоялмай,
Джюрегим ауруу да табады.
Тюрюнген дарий а кибикди тюрсюнюнг,
Къашларынгы табсыз тюймесенг.
Эй! Дуния адамлагъа джууаб бермейсе,
Джандет келечиле да иймесем.
Ай, джюрек кёзюм а сагъая санга да,
Бу тёнгек кёзюм джукълайды.
Эй! Айгъа ушагъан ариула кёрдюм,
Джюрегим сенде да тохтайды.
Ала кёгюрчюн а, сары илячин а
Кёзюу джырлайла джырынгы.
Эй! Сёз бла къыйнамам сени джюрегинги,
Ишлетиб талдырмам да къолунгу...
Маскуада алтын бууунлукъ
Учуз багъасына сатылад.
Эй! Акътамакъ сюед мени, тенглерим! -
Ачыкъ айтыргъа да тартынад.
Эрикгенледе уа юч эрик, дейме,
Ой, ырхы келиб кёчерик.
Эй! Къайын къызларынг а бардыла сени,
Эй, тюйме, кямар а тешерик.
Байчоралада да бал алма, дейме,
Къагъыб ашатыр Даута.
Эй! Джырларынг джюрек таралта, дейме,
Сёзлеринг тамакъ а къарылта.
Танышханы
Ой, беш джылымда - бешикден,
Мен он джылымда - джыйыннга.
Эй! Отузунчу джылымда, тенгле,
Тюбедим сюйген къыйыннга.
Ой, къаялада алтын джумарыкъ,
Кёкледе джулдуз учханлай.
Эй! Мен сени сюйюб башлагъан эдим,
Ауузунгдан сёзюнг чыкъгъанлай.
Бошбоюн болуб бошадым,
Атамы мюлкюн ташладым.
Эй! Бир кёк къаягъа ёшюн салгъанча,
Бир къыйын ишни башладым.
Трам Семенни джашыма,
Къарачайны Къадау ташыма.
Эй! Санга джыр этиб джырлаяллыкъма -
Мен джырчыланы башыма.
Мен дин ёзекден чыкъгъанма -
Ётюрюк бизде харамды.
Эй! Элге белгили джырчы Джулдузхан -
Ол мени табхан анамды.
Атамы сорсанг, Унух хаджиди -
Араб илмуну тауусхан.
Эй! Джети кере да Кябагъа барыб,
Ахыры, анда ауушхан.
Атамы атасы Умар хаджиди,
Хиджи Къалтурну баласы.
Эй! Ол да анда ёлгенди - бир къары джерди
Эки къабырны арасы.
Шогъайыб хаджи, Хусейин хаджи,
Джюсюб хаджи да бир джашы.
Эй! Окъуб хаджи, Осман хаджи да -
Умарны эки къарнашы.
Семенланы Къазий хаджи уа -
Ол Шогъайыбны уланы.
Эй! Айтыргъа сюйюб айтама санга,
Ёлгенин-сауун да быланы.
Кичи къарнашым Салихди,
Джаныма кемсиз джарагъан.
Эй! Анам, къарнашым, эки да эгечим -
Бир ушхууургъа къарагъан.
Чабыб барайым аллыма,
Акъырын къайтайым артына.
Эй! Эр - намысдан, ат - къамчиден,
Мен адамладан тартына.
Ёлтюрме мени этген антыма,
Былай джууукъ олтур къатыма.
Эй! Анисат дерге уялгъан этеме -
"Акътамакъ" атадым атынга.
Аталгъан атынг - Анисат, дейме,
Атагъан атым - Акътамакъ.
Эй! Айбатлыкъ атынг - Акъбулут!
Сёлешалмайма, тутулуб.
Талпытхан атынг - Таумарал,
Тансыкълыкъ атынг - Алтынджал.
Эй! Шериат атынг - Джан Нохчукъ
Кертилик атынг да - Нюр чохчукъ.
Сюймеклик атынг - Сурахай,
Ариулукъ атынг - Толгъан ай.
Эй! Тазалыкъ атынг - Акъбабуш,
Джаратхан Аллах, сен болуш!
Джангурла бла джангырады да,
Тау джалпакъланы кырдыгы.
Эй! Ижалада - Махаралада -
Ол ариуланы да урлугъу.
Ариуланы урлугъун, дейме,
Мен юй бачхама салмасам,
Эй! Мен ёлюб кетсем, эки джыларсыз,
Ол Акътамакъны да алмасам...
Ариуланы урлугъун, дейме,
Мен юй бачхама себмесем,
Эй! Тутхан ишими биширмей къоймам,
Белгили ёлюб кетмесем.
Тилегени
Мин, Акътамагъым, пайтоннга,
Хамыт салайым тарпаннга.
Эй! Аууз мардасын берлигем, тейри,
Caнга келечилик айтханнга.
Ой, Ижаланы Азрет, дейме,
Акъылны манга аз юрет!
Эй! Сен атхан сууда барлыкъды Акътамакъ,
Сен аны манга хазыр эт!
Белимде алтын къамам бар,
Мени джыргъа уста анам бар.
Эй! Эжиучюлерим - эки эгечим,
Баджаралмайды келечим.
Ой, Махар тауда тогъай чат,
Мени тору джылкъым отласын.
Эй! Кесим кесине бир тийишгинчи,
Келечи джюрюу тохтасын!
Ой, къаядагъы сюлеусюн,
Тюбюнден ёрге ёрлесин!
Эй! Минг атлым бла да мен барама -
Джюз нёгер алыб тебресин...
Мин, Акътамагъым, пайтоннга,
Ныхытны джолу тар болур.
Эй! Ол минг адамны араларында,
Аны эслерик да бар болур.
Къара Къарачай умут этеди
Окъубну мёлек къызындан.
Эй! Ёзен ишими сыртха чыгъармай,
Къысха тюшейим ызындан...
Сен - тохананы алтын байрагъы,
Мен - ортасында таягъы.
Эй! Мен муну сюймей къалай этейим,
Тийген aй кибик, джаягъы.
Ишлеялмайма ишими,
Ашаялмайма ашымы.
Эй! Эки кёзюме кюзгю этеме
Ол эки къара къашынгы.
Къоюму сатсам а - къургъакъда,
Тууарымы сатсам - тубанда.
Эй! Сени джулдузунг манга болгъаны
Джазылыб турады Къуранда.
Темирден кюбе киеме,
Агъачдан тюйме тюеме.
Эй! Сени себебли ананг Сырманы
Артыкъ айырыб сюеме.
Джангыз къарнашынг Махамет,
Атанг апенди Окъубду.
Эй! Къарнашынг бла келишир эдим,
Къартдан джюрегим къоркъубду.
Озарыкъ джолунг да - былайтын,
Тохтарыкъ джеринг - былайда.
Эй! Мен башхалагъа эсими бёлмей,
Сени сакъларем джыл, ай да.
Ой, биреу къатын келтирир,
Да, биреу атын ёлтюрюр.
Эй! Акътамакъны джылы джууабы,
Мени кёлюмю кёлтюрюр...
Терекге чирчик чыгъармы,
Джазны джылыуу болмайын?
Эй! Баш эркинлиги джокъду Акътамакъны,
Ол Сырмаханнга да сормайын.
Атынгы айтыб а, атыма минсем а,
Миннгеним - бёрю джортууда.
Эй! Ананг, шаушала, атанг, боранлай,
Мен да - умут бла къоркъууда.
Атынгы айтыб, атыма минсем,
Ол джелден дженгил элтеди.
Эй! Алтынны эритиб, кебге къуйгъанча,
Халинг кёлюме джетеди.
Атынгы айтыб, атыма минсем,
Чабхын болады джоргъасы.
Эй! Бизни ишибизге заран болгъанны
Бир къара шайтан къаргъасын!
Атынгы айтыб, атыма минсем а,
Джюрюк болады миннгеним.
Эй! Нюр тёге тургъан ол эки кёзюнг,
Артыкъ айырыб а сюйгеним.
Ой, кёкден джауум джаумайды, дейле,
Ол джер джауумну джутмайын.
Эй! Мени дуниям кетиб къалырмы
Ол акъ бойнунгдан бир тутмайын?
Сени ариулугъунг алай ушайды,
Чын миялада суратха.
Эй! Нени берликсе, Акътамакъ, ариу,
Энди эм арт, ахыр джууабха?
Ой, прауленде да оноучу,
Келишиб, улху джалаучу.
Эй! Сени сюйгенли, болгъанма мен да
Махаралагъа джолоучу.
Кезлик бычакъчыкъ, деб айтадыла,
Мияла кесген алмазгъа.
Эй! Мени барырым бир бек келеди
Бу сен джашагъан да арбазгъа.
Юсюнге бир кюн тийгенди сени,
Кёгюнгден аны батдырма!
Эй! Башынгы сакъла аман ишледен,
Керексиз сёзню уа айтдырма.
Aйранны джагъы къорлукъду,
Тюзлюкню джауу зорлукъду.
Эй! Бир башланнган иш бишеди, дейле,
Мени тилегим толлукъду.
Мен къанджал челек асмайма,
Агъач сынджырны салмайма.
Эй! Бир сеннге тенгиш киши да джокъду,
Сенден башханы алмайма.
Мен джер салгъанма тору атха,
Сизге барыргъа къонакъгъа.
Эй! Кёзюу-кёзюу таурух айтырбыз,
Ким уста болса да джомакъгъа!
Ой, къызны барды да къыркъ джаны, дейле,
Тилесем, бирин бермезменг...
Эй! Мен балта тутмаз къарт болсам да,
Сен таукел этиб а келмезменг?
Санларым, сагъат кибик, бурулад,
Джюрегим санга байланыб.
Эй! Мен сенден ариу табалмагъанма,
Сау Къарачайда айланыб.
Бизни джылытыб турлукъду, дейле,
Чууакъ кюнюбюз батмайын.
Эй! Къоярыкъ тюлме Окъубну къызы
Ариу Анисатны табмайын.
Ой, кече тийген ай болур,
Бу кюндюз тийген кюн болур.
Эй! Кечем - джукъусуз, кюнюм - тынгысыз,
Ой, мени кибик да ким болур?
Сюйгенин алгъан болурму?
Табмайын къалгъан ёлюрмю?
Эй! Экибизге зараны тийген,
Дунияда игилик кёрюрмю?
Ой, эмен отун, кёреме, дейле,
Къазанны кючлю къайнатхан.
Эй! Ётюрюк сёзле болалла, дейле,
Адамны бетин уялтхан.
Ой, къара шилли да, акъ шилли,
Къайдан келгенсе сен кюнлю?
Эй! Ашагъан ашым джукъмайды мени,
Ой, сени къараб кёргенли.
Ой, къара къауал шкогум, дейме,
Аны сампал ташы чакъмайды.
Эй! Намыс этеди адамларындан -
Бу мени кенгнге уа атмайды.
Тюкенде алтын бууунлукъ,
Учуз багъасына сатылад.
Эй! Акътамакъ сюед мени, тенглерим,
Ачыкъ айтыргъа уа тартынад.
Ой, уучу уугъа бармайды,
Бойнуна шкогун такъмайын.
Эй! Манга айлансанг, сен сёлешмейсе,
Кирпиклеринги къакъмайын.
Аджал бла таджал: "Сайла!" - деселе,
Сен къайсын сайлаб алыренг?
Эй! Джазыуунг манга болуб тургъанлай,
Сен кимге къачыб барыренг?
Джибек джаракны джангысы бла
Кюн сайын чабыр киеме.
Эй! Мен сени амалтын, Ай толгъан ариу,
Джамагъатынгы да сюеме.
"Келген келинни аягъындан!" - деб,
Бyруннгуланы санауу.
Эй! Барыб турлукъду бу сюймекликни
Къууанчы бла джылауу.
Батыма бийче, ой, байрам гогуш,
Тауханий, бизге бир болуш!
Эй! Чыначыкъ, къынгыр болуб турма да,
Сен мени бла да бир соруш!
Джарасы болгъан - оруннга,
Джюрюшю болгъан - джолуна.
Эй! Сен бизге келсенг, алым берирме,
Алымчыланы да къолуна.
Эки аягъым да ёзенгиледе,
Бу сол билегим - джюгенде.
Эй! Бизнича, сейир киши болурму,
Туура айтхан-айтхан а, дегенде?
Арпа сабанда уа, будай баш кибик,
Сен тенглеринги ичинде.
Эй! Къобан келгенча, аллынг айланыб,
Мени кёрге эдинг тюшюнгде.
Мен джер джюзюнде излеб джюрюйме,
Сеннге элтген джолну табмайма.
Эй! Эминадан къалгъан таджалма,
Башымы суугъа да атмайма...
Ой, къызыл джезле, къалайла, дейме,
Болур бизни кибик аллайла.
Эй! Билим базманда дженге турсам да,
Мени махкемеге уа салмайла.
Ой, тёре кесген бармакъдан, дейме,
Не кюрешсенг да, къан чыкъмаз.
Эй! Сюйгени болгъан ойсураса да,
Болджалы джетмей а, джан чыкъмаз.
Анангы сёзюн эркелет, дедим да,
Атангы сёзюн унутма.
Эй! Накъырда этгеннге тынгылай турма,
Айтхан айтханны да джуууртма!
Джарлыны тону джамаулу,
Байны кийими сакъланыб.
Эй! Джарлыны кёлю ачыкъ болады,
Бай, байлыгъына махтаныб.
Бу бачха байлыкъ а - бир айлыкъ, дедим да,
Бу мычхы тартыу - къакъ сатыу.
Эй! Тюрсюнюнгю кёрюрден оздум,
Сёзлеринг манга - бал татыу.
Мен былай бла джашаялмайма,
Бир башха хыйсаб этмесем.
Эй! Мени ёмюрюм тарала кетер,
Акъбоюнну алыб кетмесем.
Акъылым сёнгдю билинмей,
Ёмюрюм ётдю кёрюнмей.
Эй! Менден къалгъанла бир тынч туралла,
Бу сюймекликге бёлюнмей.
Мен сени атынгы атай барама,
Тамгъамы салсам малыма.
Эй! Сарасан кийик - алтын сыргъалы,
Келиб къаллыкъса аллыма.
Джашилдженгер, къызылдженгер,
Бу джараланы сау этер.
Эй! Мен махтау салгъан Сурахай ариу,
Мени баш байладан да бай этер.
Миллет не къадар кёб болгъанлыкъгъа,
Ким да, адетин этеди.
Эй! Сюймеклик деген суу кёмюк тюлдю,
Узакъ ёмюрге кетеди.
Кече - бёрю, кюндюз, тели болуб,
Эки бутуму ат этдим.
Эй! Санга термиле, санга тарала,
Джаш санларымы къарт этдим.
Бу тиширыуну арты сенмисе,
Таймай, кёреме тюшюмде?
Эй! Сен - джауар булут, мен - илеш умут,
"Дыб!" - деб таммайса юсюме.
Ой, уллу Къобан кёб суулу,
Кёк кечюулери, сай кибик.
Эй! Акътамакъ ариу, къайдан келесе,
Сен джарыкъ толгъан, ай кибик?
Ой, Акътамагъым келеди,
Джети ариудан баш болуб.
Эй! Туура аллай кёзбау къалай туугъаненг,
Ёренге джохар чач болуб?
Сени таукел, кескин сёзлеринг
Джюрегими джауун ашагъан.
Эй! Акътамагъым, къайдан келесе,
Сен кюн таякъгъа ушагъан?
Темирден ишлет да бир хуна,
Тыяллыкъ эсенг, бир сына.
Эй! Сен мени кёрсенг, илеш ышара,
Мен сени кёрсем а, кёз джума.
Сен сол джагъаны - беджени,
Мен онг джаныны - гёзени.
Эй! Адам улуну бир таджалыды
Бу сюймекликге тёзгени.
Сени кёк дарийден кёлегинг,
Андан кёрюнеди билегинг.
Эй! Кёрюнмесин сени билегинг,
Мени къабыл болсун тилегим.
Сёзню сёлеше, къала этдим,
Сёз халыладан - аркъауум.
Эй! Кёкюрек ауруу да, джюрек ауруу
Мени Акътамакъдан табханым.
Сокъгъан окъадан кёреме,
Бу Сурахайны дженглери.
Эй! Анга адеб этиб, алай тепсейлe,
Тау маралымы тенглери.
Чууакъ кечеде, санга ушатыб,
Мен джулдузланы санайма.
Эй! Кюндюз болса уа, учунуб келиб,
Ариулугъунга къарайма.
Кёкде барады къарылгъач,
Эки къанатын джаймайын.
Эй! Сен - кёзбау сурат, къалай тураса,
Бир джангыз сёзден таймайын?
Кёкде барады къарылгъач,
Эки къанатын, талдырыб.
Эй! Башханы алмам джангыз да, Акътамакъ,
Сени кёлюнгю, къалдырыб.
Сен манга чарлай, мен сени марлай,
Бy туу санларым къарт болду.
Эй! Отузунчу джылымда мени, Акътамакъ,
Ой, сары чачым акъ болду.
Ишлене тургъан бу сёз къалабыз,
Ол къурч буруудан кем болмаз.
Эй! Cюйген хапарын айтханлыгъына,
Адамны бети уялмаз.
Арбамы джекдим ёгюзге,
Сагъат баргъанды сегизге.
Эй! Чууакъ кюн кибик, алай келесе,
Ариулугъунгу кёргюзе...
Ичги сёзлени кёбге чачмагъан -
Бу сюймеклини кирити.
Эй! Шош шыбырдагъан, эслеб тил тутхан -
Джангы келинни адети...
Мени таукел болду джёнгерим,
Сени Джаукер болду къарнашынг.
Эй! Экибиз бирден сюйюб башламай,
Сюймеклик джолдан аджашдыкъ.
Мени хурджунумда - базар кёгетим,
Санга ашатыргъа - иннетим.
Эй! Ахыратда да бир оноу болур,
Дунияда сенсе - джандетим.
Мен сеннге джюрюй, болуб барама
Сay санларымдан ырахын.
Эй! Ананг Сырмагъа айыб салмайма,
Атангы болсун гюнахым.
Джап-джашил къундуз а кёреме, алан,
Тыйын палтонунгу джагъасы.
Эй! Атанг Окъубну не мюлкю барды,
Meни джырларымы багъасы?
Алтын ашыгъым, кюмюш къашыгъым
Унамайды эрге барыргъа.
Эй! Бу суу кюзгюню Аллах джаратды,
Джюреклеге ауруу салыргъа.
Бу суу кюзгюню да сатыб алыргъа уа,
Мени болгъан мюлкюм джетмейди.
Эй! Закон бла дау къуруса да,
Джюрегими дерти уа кетмейди.
Сени кюнчыкъгъанда бир кёрюр ючюн,
Кюнбатхандан джаяу барырем.
Эй! Бy джохар чачынг чыммакъ болса да,
Бир майрышмайын алырем.
Сени бир тюрсюнюнг - джаз джилек,
Бирси тюрсюнюнг - акъ къаймакъ.
Эй! Джюрек ауруу береди меннге
Учханкёз ариу Акътамакъ.
Мен от салгъанма пинаргъа.
Чумду, дейдиле, чинаргъа.
Эй! Бирибиз ёлейик, бирибиз къалайыкъ,
Apиy, кёзлени джумаргъа.
Тёп-тёгерегинг тар буруу болуб,
Ой, бара барыб абыннгын.
Эй! Арт айланса да, къайтады, дейле,
Сен къайтыб, манга джалыннгын!
Къыйынды кёлюнг, джюрегинг,
Ой, саргъалады билегинг.
Эй! Меннге уллу кёллю болалмаз кибик,
Бир тюшюнюуге yа тюбегин!
Партабак сурат, дейдиле,
Къолума тутхан кёзюрге.
Эй! Сёзюм да сёздю, ишим да ишди -
Накъырда этмейме безирге.
Сени къулагъынгда сыргъала,
Юслери бютеу тумада.
Эй! Сени кибик ким болур, алан!
Бу джаратылгъан джанлада?
Тюрленнген дарий кибик, тюрсюнюнг,
Къашларынгы табсыз тюймесенг.
Эй! Дуния адамлагъа джууаб бермейсе,
Джандет келечиле иймесем...
Къарачай тилим тауусулгъанды,
Энди латин бла джазмасам.
Эй! Мен сени алыргъа бичим салмазем,
Адамлыгъыма базмасам.
Темирден ишлет да бир хуна,
Тыяллыкъ эсенг, бир сына!
Эй! Сен мени кёрсенг, джунчуб къубула,
Мен сени кёрсем а, кёз джума.
Сен кёк таланы - джашил гоккасы,
Мен - ортасында кюрени.
Эй! Тийрелеринден чыгъыб келеди,
Таукел джюрекни сюйгени.
Мен алтын бюртюк тарыма,
Алтындан эсе сарыма.
Эй! Сен къалайгъа барсанг да, Акътамакъ,
Мен да биргенге барыма.
Эменден элек бюгюлмез,
Кюнлюмден кюмюш тёгюлмез.
Эй! Къан бла кирген исси сюймеклик,
Джан бла чыкъмайын, сёгюлмез.
Кюмюшбаш юй
Кюмюшбаш юйюнг, алтын курушканг,
Мени санга барды гурушхам.
Эй! Джазыуубуз бир нек болмаед,
Сен да сагъайыб болушсанг?!
Кюмюшбаш юйюнг, алтын сарайынг,
Терезелери налмаздан.
Эй! Мен сени алыб кетиб къаллыкъма,
Ой, Бермез бла Къоймаздан.
Кюмюшбаш юйюнг, алтын сарайынг,
Терезелери накъутдан.
Эй! Мен Акътамакъыны сайлаб алгъанма
Эллени уллусу Къарт Джуртдан.
Алтын терезеде, налмаз орагъым
Сохан тахталаны орургъа.
Эй! ГеПОО болуб, мен къалгъа эдим,
Санга соруула сорургъа.
Санга улан туууб, бешикге салсам,
Бешли бугъала соярма.
Эй! Тёгерек тутуб, уллу той этиб,
Сау Къарачайны джыярма.
Кенгден къарасам - къарылгъач,
Къатына барсам, къуш болур.
Эй! Джашлыгъында сюйюб къалгъанны,
Къартлыкъ кюнюне да кюч болур.
Узакъдан къараб айбатды,
Къатына барсам, нюрлюдю.
Эй! Мен Сурахайны сюймей не этейим,
Къалгъан къызлада
Anam da Atam da sense KARAÇAY
Mesaj düzenlendi tinibek - Perşembe, 07-01-10, 9:28 PM |
| |
| |
