89 Суура Ал фаджр - Танг.

Рахматлы Джумушакъ Аллахны аты бла.

1.Мен ант этеме агъарыб атхан танг бла да,
2.он кече бла да,
3.Пара-пара джаратылгъан бла да, нёгерсиз бла да,
4.саркъыб бошалыб баргъан кече бла да.
5.Сора акъылы баргъа бу антла джетмеймидиле?
6.Сора Адны къауумуна Раббинг къалай этгенин, сен билмеймисе?
7.Узун багъанала бла ишленнген Ирама деген элге,
8.аныча бир къралда да болмагъан?
9.Къаяланы кесиб ёзенледе юйле ишлеб тургъан, Семудну къауумуна да?
10.Ол къазыкъла иеси фыргъаууннга да?
11.Джер - джерде, къраллада чекден чыкъгъанлагъа да.
12.Ала джер юсюнде, къраллада кёб бузукъла этген эдиле.
13.Сора Раббинг аланы юслерине азаб къамчисин джаудурду.
14.Ишексиз, сени Раббинг халкъын мараб (сынаб) турады.
15.Сора адамны , сынаб Раббиси анга дуния байлыкъ берсе, ол: "Раббим, мени сыйлы этди", - дейди.
16.Сора, дагъыда, сынаб рысхысын дыккы этсе, ол: "Раббим мени сыйсыз этди", - дейди.
17.Огъай, алай тюлдю! Сиз не ёксюзню сыйын кёрмейсиз,
18.не мискиннге аш ашатыргъа кишини къозгъамайсыз.
19.Бир-бири тюбюнгю (ёлгенни) туташ ашайсыз.
20.Байлыкъны уа, мардасыз, къаты сюесиз.
21.Огъай, алай тюлдю! Джер букъу - чукъу болгъан заманда,
22.Раббинг да, саф - саф болуб тизилген мёлекле да келген заманда,
23.сора ол кюн джаханим да келтирилир, хар адам да ол кюн этген затларын эсине тюшюрюр эсгергенден а не хайыр.
24.Сора ол: "Ах анасыны, бу джашауума (ахыратыма) да бир джукъ къурасам эди", - дер.
25.Сора ол кюн Аллах азаб бергенча, анга бир киши азаб бералмаз.
26.Ол салгъан богъоулача да киши бугъоу салалмаз.
27.(Тюз адамгъа ол кюн): "Эй, тынчайгъан джан!
28.Раббинге къайыт, сен Анга, Ол да сеннге разы болгъан халда!
29.Энди Мени къулларымы ичине кир!
30.Мени джаннетиме да кир!" - деб айтылыр.