.
KELİN KOYUUÇULANI BAŞ SILTAULARI
Tau tübünde bir elde, kelin ala tebresele, kartı caşı da cayılıb izleydile, kol ayazıbızda tutarıkbız deydile, keleçi-töreçi salıb tileydile, tileb, kelmese ua, süyreb keltirirge süedile.
Alay a ala kelin tuta bilmeydile, kelinleri bla sense-mense deb caşarga süymeydile, kelinni kesinden bernesine bek karaydıla, kelin koygannı mahtauga sanaydıla, koyar innetge kirsele, cüz sıltau tabadıla, kelinlerine «igidi» deb aythandan ese, başlarına bir igi urdururga razıdıla, «kelinçikni caratmaybız» deb keslerine küç çakıradıla, «kelinçik, bizni caratamısa» deb sorurga ua - unutadıla.
Ma ol tau elde kelin koüuçulanı baş sıltauları. Kermahanları kelinlerin «oltururun-tururun bilmegenley kelgendi da, üretgenibizni ala da bilmeydi» deb koygandıla, Kıblahanları ua «tıbırnı asırı köb saklab kelgendi da, aman - igi da ol bilmegen cokdu» deb koygandıla.
Nançıkları kelinlerin «asırı erşidi, adam türsününe karayallık tüldü» deb koygandıla, Cançıkları ua «ne alamatlıgı da ol çırayçıgıdı da, biz alay olturtub, anı türsününe karabmı turlukbuz» deb koygandıla.
Sarasanları «adamlıgına köre bernesi cokdu» deydile, Horasanları ua «bernesine köre adamlıgı cokdu» deydile.
Sarıçıkları «ileş tüldü, asırı suuuk adamdı» deydile, Karaçıkları ua «tanıganına tanımaganına da asırı bek ileşedi» deydile.
Haciuları kelinlerin «honşuga-tiyrege igi tüldü, bılay birini üyüne kirib da bir olturmaydı» deb caratmaydıla, Caciuları ua «tang atmay honşulaga bir kirse, ekinçi üyün coklay bilmeydi» deb caratmaydıla.
Laliyları «asırı kızgançdı» deb sözün etedile, Haniyları ua «kesin kısdırmaydı», bu barıudan barsa, üyün suu cuuganlay eterikdi» deb caratmaydıla.
Gaşaları «hapçüş» degenley anasını burnundan tüşüb kalgandı» deb sözün etedile, Goşaları ua «ol igi anasına da bir cugu uşamagan» deb sözün etedile.
Taucanları «kalganlaga igi bolganlıkga, caşıbıznı kulakga almaydı» deb sözün etedile, Marcanları ua «caşıbızga igi bolganlıkga, kalganlanı kulakga almaydı» deb sözün etedile.
Babuşları «biz bir aytsak, ol eki aytadı» deb caratmaydıla, Goguşları ua «başına ura tursang da, beri aylanıb cuuab ete bilmeydi» deb caratmaydıla.
Şeriyları «asırı sant cüregi bardı, körmeymisiz anı ol et tutub turganın» deydile, Geriyları ua «asırı kaygılıdan üsünde karga kabar eti cokdu» deydile.
Damgeları «kesim aythan deb turgan bolmasa, kişini aythanın san etmeydi» deydile, Şamgeları ua «kim ne aytadı deb auuzun açıb turgan bolmasa, başına onouu cokdu» deydile.
Kıstanaları «birinçi keleçile barganlay, birgelerine turub tebremey, ızından bir köb aylandırgandı» deb sözün etedile, Kızbalaları ua «nasıbı alay bolsun, biz keleçile iyib kelgen bolur, kesi caşıbızga tagılıb kelgendi» deb sözün etedile.
Tomayları «biz koygunçu, ol bizni koygandı da ketgendi» deb, can-canların aşaydıla, Çomayları ua, caşlarına aythanların etdiralmay, kelinleri bla bal-cau bolub caşaydıla.
Hubiylanı Mağomet aytadı