Otarları jırlaydıla

Ullu jırçı ullu duniyanı bagasıdı, betidi. Ullu jırçısı bolgan halk ullu, uzak tarıhı bolgan halkdı. Anı bile, kuuanabız. Az halknı ırıshısını da az boluuuçusun esge alsak, anı jır janı bla, hunerle janı bla bir zamanda kemligi bolmagandı. Eşigi, Omar ömürle bla aytıla kelgen jırlanı aytadı, alaga kesi ömürünü küreş jolların koşa ese da! Alanı ua, ol burunngu jırlanı, Omar kibik jırçıla etgendile; jaşaunu terenden köre bilgen, ullu sermeşlege, batırlıklaga, kargaşlık, korgaşlık şartlaga şagat bolgan, halkları bla birge allay işlege kesleri katışhan zakiy adamla! 
Jırla - ullu, uzak tarıhnı, milletni niet baylıgını şagatıdıla degen zamanıbızda, esibizde ol turadı, jırlanı bolgan işlege atalıp etilgenleri - küyle, tarıgıula, iynarla, aytışla, batırlık jırla, tarıh, jortuuul jırla, nart batırlanı söngmez, unutulmaz jortuuulları...

Ullu jırçı halk jırlanı kallayın aythanda da, tarıhha jan kirip, ozgan zamanla, bügünngü künde jangıdan bola turgança, jırnı batırlarına, buşuulu, kuuançlı işlerine kesibiz katışhança alay körebiz. Ullu jırçını dagıda bir ençi işanı - ol jırlaganda, kesi körünmey, kesi jırnı hauasına, tabiygatına tolusunlay singip ketip, bizni bla betden betge jalanda jır kesi kalıp kaladı. Jalanda jır! Jırlagan duniya! Sermeşgen, halknı koruulagan, kişilik etgen adamla! Süymeklik! Ajım! Toy! Buşuu!

Otarlanı Omar - auazı jetip, jır huneri körünüp, alga bir arbaznı, ızı bla bir elni, andan sora halknı, ahırında - saulay duniyanı allında jırlap başlaganlı har taulunu, türk milletden adamnı jüregi uçunup, öhtem bolup, ol insan ulluluknu sezedi, sınaydı.
Jırçı Omar, degende, akılman Kyazim, degença, zakiy Kaysın, degença, halkıbız kesini kıyınlı tarıhında, insan ulluluknu, adamlıknı bir zamanda da kem etmey kelgen kadarında, Omar anı barı kıyınlıgı üçün Allah bergen saugasıdı, dep, men alay karayma. Azlık, artıklık, ülüşsüzlük, jer tarlık ne bek kısa, bulçuklarından çökdüre kelgen zamanda da, kabar kabını, içer suuunlay, tarkayganda da, halkıbıznı jırga tıngılar kudureti bolgandı, anı bla kaygıların ugay eseng, açlıgın okuna unuturga kolundan kelgendi.

Bizni ömürübüzde Omar edi halkıbızga allay korgaşlık etgen, anı jırları, sabır adamlıgı, taukelligi, har zamanda birça jaşau tiriçilikge, adam akılını horlarıgına iynannganlay kalıuçu taulu asıllıgı! Seyir tüyülmüdü, XX ömürnü arasında, bir iş ahlusu taulu milletni küysüz kadar allay bir bulgaganda, tük-tük, jik-jik etil, kum tüzlege, taulaga, kakıraklaga çaçhanda, uruş otuna athanda, insan çüyrelikleni örtenlerinde üyütgende, anı jırçısı ol ullu kara bulganıunu em allında - zulmuçunu kara kalagını tüz da ogursuz uçunda bolup turganı?! Anı üçün tüyülmüdü bügünlükde malkar milleti sau-esen jaşay ese, tepsey ese, jırlay ese, saban süre ese, üyle işley ese, kızla, jaşla ösdürüp, jangı üyürle kuray esse - alanı barısı üçün bek alga anaga, emçek sütün bir kara küç da kurutalmagan taulu tişirıuga, ızı bla taulu jırga tabu etgenibiz?

Millet betibizni sansınmagan keziuleribizde okuna ol Ömürlük Ullu Jırnı - Milletni Janın - az da kem etmey, ol ugay eseng, bütün Ullu, bütün Bay, bütün Jarık ete kelgen Omar tüyülmüdü? Jırnı faygambarı tüyülmüdü ol?
Şukur bolsun, jırçı Omarnı betinde halkıbıznı kuuatlı beti körünedi!
Şukur bolsun, Omar jırlagan jırlada halkıbıznı tarıhı jaşaydı, halkıbıznı jolları hans basmay turadı. Bügünlükde jırlarga süygenle, jır fahmuları bolganla köpden-köp bola barganları - ol a Omarnı igiliginden tüyülmüdü?

Omar jırlaydı! Anı tukumu jırlaydı! Otarları jırlaydıla! Köp ömürlege jırlasınla!
Omar jırlaydı. Anı halkı jırlaydı! Köp ömürleni jırlasın!
Jırnı başın bir zulmuçu kesalmadı! İnşa Allah, ömürlede da kesalmaz!
Kaçan ese da bizni halkıbıznı jerinde, töründe jırga demengili esgerme salınır dep iynanama! Ol esgerme Omar sıfatlı bolluk sunama!

Töppelanı Alim