Karaçay-Malkar Millet Bayrakdagı tamganı tamırı, Kafkazda Karaçaynı em eski ellerinden biri Kart-Curt elde tabılgan, üsünde cazuvla emda tamgala bolgan, Hicri 1107, Miladi 1695 cılnı körgüzgen, ertde zamandan kalgan bir esgertme taşdan keledi. Taşnı üsünde Arap tilde emda Arap harifle bla cazılgan Karaçay-Malkar tilde cazuvla bardıla. Taşnı betinde, örge canında Arap tilde; "Allah, Muhhamad, dagıda tört ullu halifni atları: Abubekir, Umar, Osman, Aliy” deb cazılgandı. Taşnı enişge canında Arap harifle bla Karaçay-Malkar tilde "Bügün Manga, Tambla Sanga” deb cazılgandı. Bu eki cazuvnu ortasında va bir tamga bardı. Bu tamga, bayrakdagı tamganı tamırıdı. Karaçay-Malkarlı ilmu adamlanı aythanlarına köre; tamganı em tışındagı tögerek neda kurşov alamnı, kozmosnu körgüzedi. Tögerek belgini içinde har bir kıyırı kıngır sızılgan törtgül; suv, ot, topurak emda havanı, alay demeklik duniyanı körgüzedi; törtgülnü har bir müyüşü da duniyanı tört canın belgileydi. Tamganı ortasındagı kurşov bla anı içindeki Mingi Tav belgi va ata curtubuz Kafkaz bla Karaçay-Malkar halkıbıznı körgüzedi. Em ahırı, bayraknı betindegi caşil boyav; tabigatnı, caşavnu, tınçlıknı, mamırlıknı, bereketni, aşhı innetni, adeb-namısnı; dagıda sıylı İslam dinibizni belgileydi.
