Seyir adam bla tübeşiv, bayam,
kimni da esinde kala bolur. Allay tanışıvla bla bayıklandıradıla caşavuñu, iç
duniyañı da.
Köp bolmay Elbrusoidde Karaçayda, Malkarda da atı aytılğan,
cırla cazğan, nazmuçu Özdenlanı Safar bla coluğuv bolğandı. Arı kelgenle ol kün
zamanların anda aşırğanlarına açıv etmegendile derigim keledi.
1980 cıllada har tavlu üyde eşitile edile «Cankozla»,
«Alğış», «Karayma da…», «Osuyat» degen em başha cırla.
Ol zamanda, bayam, hazna sağış da ete bolmaz edile alanı
avtoru ua kimdi dep. Men da köz allıma keltirallık tüyül edim ol ariv makamlı,
mağanalı sözleri bolğan cırlanı avtoru alaşa, uyalçak, iymençek caşdı dep.
Kertidi, anı cır aytıvunda bir türlü kereksiz omaklık, koşaklık
bolmağanı seziledi. Alay tuvra Özdenlanı caşlarını caşavu sport bla baylamlıdı,
kesi da trenerdi deb a turmağanma. Tübeşivde Safarnı üsünden allay şartla
açılğanı köplege cañılık edi.
Anı üsünden tolurak aythanda va, ol Karaçayda tuvğanlıkğa,
80-çi cılladan beri Tırnıavuzda caşap, sabiyle bla işleydi. Nazmula, cırla
cazğanın koyalmaydı. «Koyalmaydı» degenimi mağanası, Safar, koluna gitara alıp,
halk allına çığıp cırlağannı er kişige tiyişli işge sanamaydı.
- Ol kıztekelikdi. Allah a, koymay, meni kuru arı türtüp
turadı. Kesim gitçe adamçık bolğanlıkğa, cazğan a köp eteme, - deydi Özden ulu.
Sora ol har sahnağa çığıp, cırlarğa küreşgenñe «cırçı»
degenlerin tüzge sanamaydı.
Nença kere tüşünüp barabız «Cır Karaçayda etilir da, Malkarda
eşitilir» degensöznü kertiligine. Eki
respublikada da birça atları aytılğan Özdenlanı caşları – Safar bla Albert –
sahnağa colların bizde başlağandıla. Mında cırların televideniyada, radioda
cazdırıp, ala alğınñı kassetalada ellege cayılıp, har üyde bağalı konak bolup
turğandıla.
Safar caşavunda allay boluşluk etgen adamlanı - Kuliylanı Kaysınnı,Beppaylanı
Mutalipni, kompozitor Cettelanı Mustafirni, başhalanı da ullu hurmet bla
sağınadı. Mutalip Özden ulunu Kaysın bla tanışdırıp, ol a, şuöhu Lev Oşaninñe
söleşip, Moskvadağı Gorkiy atlı Literatura institutha okurğa barğanın da
aythandı ol.
- Malkarda birinçi bard cırla Canataylanı İsmayıldan
başlanñandıla. Kalay alamat aytıvçu edi ol alanı. Nek ese da, anı atın da
terk–terk sağınmaysız, -dep, Özden ulu anı da kemçilikge sanağandı.
Sport bla küreşgen caş nazmuçulukğa kalay kelgendi, derge da
bollukbuz. Ol kesi bildirgennge köre, ana tiline süymekligi ulludan. Sabiyi bla
birde orusça söleşse, kesi kesine ayıp etip, öz tiline kaytadı.
Cette ulu köp caş cırçığa boluşa kelgendi. Ol zamanda
televideniyada işlegen, Safarnı studiyağa çakırıp, aña köl etdirgenin da
aythandı nazmuçu: - Erttenlikge deri cırla!- dese, men a seyirge kalıvçu edim.
Bu işni sıltavun da añılatayık. Karaçay - Çerkes Stavropol kraynı
sanına kirgeni sebepli, alanı keslerini televideniyaları bolup, öz tillerinde
berivle hazırlarğa oñları bolmağandı.
Bizde va studiyada konaklağa alada bolmağan oñnu
tapdırğanları karaçaylılağa bolmağança savğa edi.
Gitaranı soğarğa da ol askerde kulluk etgen zamanında
üyrenñendi. Safarnı sezimin kozğağan da eki adam bolğandıla. Askerde anı
gitarağa üyretgen bizni kıralda ertteden caşağan kıtaylı bla Moskvadağı
Yaroslavskiy vokzalda cırlap süyelgen caş.
Bayam, caşavunda ala bla da ol boş tübemegendi… Tübeşivge
kelgenle, sözsüz, Özden ulunu cırların da saklağandıla. Ol, koluna gitaranı
alğanında, bir kesek buyukğança edi. Andan bolur edi, közlükleni kiyip, alay
başlağanı da. Aña tıñılağanla ullu zavukluk alğanların, cırlarını sözlerine
sansız kalmağan caş tölü bla anı arasında uşak carık, ışanñılı halda barğanın
sezgen bard, közlüklerin keterip, andan arı alay beriledi cırğa.
«Cankozlanı» ayta turup, anı beti türlenñenin sezeme. Soruvla
berirge keziv cetgende, anı sıltavun sorama. Avtor aythanña köre, ol anı caşavu
bla baylamlıdı. Bir elli birgesine okuğan kızçıknı süygendi. Caş aña cankozla
cıyıp bergeninde, ol alanı tögüp ketgendi… Safarnı cıl sanı altmışha cuvuklaşhandı.
Ol sabiy sezim anı cüregin bügün da alay kozğağanın, ol anı üsünden aythanı
Özden ulunu iç duniyasını, adamlık kaçını üsünden haparlaydı.
Konak ol zamanda iymene olturğandı. Söz biyağı aña bla cırğa
berilgende va, ol, başha türlü adam bolup, kesi da bu tübeşivden ırazılık taphanı
eslendi.
Ahırında anı kurağan Ksanalanı Fatima bir kuvançlı hapar da
bildirgendi. Cuvuk zamanda Moskvada Özdenlanı Safarnı «Es» degen kitabı çığarıkdı.
Arı anı nazmuları, cırları da kirgendile. Bu ahşı iş a
Bidcilanı Mussanı hayırından bolğanın da bildirgendile tübeşivde.