Malkarnı cerlerinde köp ullu, gitçe da elle bardıla, alanı
har birini kesini ençi beti, tarıhı bardı. Ol elleni kuralgan cılların
tohdaşdırgan kıyındı: alanı tamırları teren ketedile. Biz a ol ertte ötgen cıllaga
kaytıp, andan bügünübüzge cararık zatlanı çıgarırga küreşebiz. Biz anda ne
izleybiz? Halkıbıznı kuralıu çagın? Ceribizni halın, bolumun? Ne zat izlesek
da, barıbızga da belgili zat: adam essiz, akılsız caşayallık tüyüldü.
Biz gitçelikden beri okup kelgen kitaplada bizni
öhtemlendirgen zatla köpdüle. Alanı bir kauumun esgereyim: 1-çi noyabrda, 1917 cılda,
Çegem auzunda, tögeregin biyik kayala kurşalagan,
Ogarı Çegem degen burunñu taulu elde, malçını üyüründe, ullu poet, Kuliylanı Kaysın
tuugandı. Ol bizni elibizge da, şkolubuzga da köp kere kelgendi. Bu men körgen
taulanı, kayalanı biyikliklerin, alanı başlarında ak karların körgendi. Bu men
şkolga cayau cürügen col bla ötgendi. Bayam, busagatda bu men köldencazma caza
turgan stolga Kaysın da olturgan bolur edi degen akıl kölümü carıta, har sözüme
cürek cılıuumu berirge itineme.
Kaysınnı Laşkuta orta şkoluna (endi Canhotiyanı orta şkolu)
kelip, «Laşkutanı şkolunu ustazlarına bla şkolçularına» atap cazgan nazmusundan
üzügün keltirirge süeme:
Cer-cerlede aylana,
Köp igi zatla kördüm,
Unutmazça alanı
Men caşagan ömürde.
Sizge konak bolganım-
İgi künleden biri.
Ak bulutu bulgana,
Turur ol köpge deri.
-Ol kün sizni şkolda
Ne kuuandırdı meni?-
Nizamlı, ariu halda
Etgenigiz har neni.
Etdigiz bek ırazı,
Kuuanç çalısın eşdim,
Kellik künnü auazın
Önlerigizde eşitdim!..
Önleribizde eşitilgen auaz bla aytabız bügünda ana
tilibizge, Ata curtubuzga süymekligibizni.
Respublikabıznı har elinde da bardı köp seyirlik da, aythılık
da, belgili da adamıbız.
Holam-Bızıñı auzunda, Şıkıda, tuugandı, malkar literaturanı
murdorun salgan, Möçilanı Kyazim.
Ogarı Çegem el - carıklandırıu işge, literaturaga ullu kıyın salgan Şahmurzalanı Saidni tuugan
elidi. Tegenekli degen elde, akademik, Zalihanlanı Mihail tuugandı. Sovet
Soüznu cigiti, Baysoltanlanı Alim, Yanikoy elinde tuugandı. Girhocanda, Malkarnı
ullu cırçısı, Otarlanı Omar, Malkarnı ullu poetleri Otarlanı Kerim, Zumakulanı
Tanzilya, Bayzullanı Aliy tuugandıla. Şauurdat degen eski elde tuugandı,
Rosseyni belgili artisti, Ulbaşlanı Mutay. KMKU-nu professoru, cazıuçu,
Tolgurlanı Zeytunnu tuugan eli – Bıllımdı. Köndelen el, ullu cazıuçularıbız
Töppelanı Alimni, Şaualanı Hasannı emda ullu kompozitorlarıbız Bayçekullanı
Abidinni bla Cettelanı Mustafirni tuugan elleridi. Ullu cırçıbız, Taukenlanı
Galina, Kaşhatau elde tuugandı. Karındaşla – Kurdanlanı Hasan bla Husey, Canhotiya
elde tuugandıla. Hasan – himiya ilmulanı doktorudu, Husey a – medisina ilmulanı
doktorudu. Bizni şkolda malkar tilden okuthan birinçi ustaz, halk ökülü,
Sottalanı Adilgeriy bolgandı.
Aytıulaga köre, Canhotiya el 1927 cılda kuralgandı. Mında,
örge canında kayada, «Kuru kol» degen dorbun bardı. Ol dorbunda, Canhot degen
bir abrek, kaçıp kelip bukgandı. Anı taphanlarında, ol tutulurga unamay, atışda
ölgendi. Andan sora elibizni atına «Canhotiya» dep atagandıla.
Biz caşagan elni, Canhotiya, bla honşu el, Laşkutanı arasın
Bahsan suuu ayıradı. Ol Hayıuka, Kül bet, Artkol, Alçagır, Ögüzle uruuçu,
Kiyikçi, Artayak degen cerleribizni üsü bla baradı.
Küz artında, elde, ertte keç bolup başlaydı, kün kıshadan – kısha
bola barganın körebiz. Tögerek sarı-morgulga bölenip, taula ortaında elde,
şoşluk seziledi. Üyle, gebenle, töşle, tüzle da ol şoşlukga tumalanadıla.
Terekleni çapıraklarını karıuları ketip, algınça carıklıkları bolmay, şoşlukda
muthuzlanadıla.
Adamla cumuşlarına çıgıp, bahçalarında boşayalmay kalgan
işlerinde murkku etedile. Kartla malçıkların otlarga kıstaydıla. Caydaça şatık
bolmasa da, tögerekde, kögergen cerlede, ırahat otlay aylanñan malla elge
bereket beredile. Kün kısha bolganı sebepli, el oramla bla mallanı enişge,
üylerine sürürge tüşedi. Kart ınna, kadalıp, hırtlı katapadan tigilgen
albotasına nartüh uuadı. Ol tauukların aşatıp cıyarga aşıgadı. Sabiyle, üy cumuşlaga
boluşa, terek butaklaga iline, aladan da üslerine, başlarına çapırakla tüşe,
arı-beri çabışadıla. Ala alay ete turgunçu kalın iñirlik, suuuksurata, enişge catadı;
cerni birsi canında ua, auur bolup, kızgıldım ay salınadı.
Kalay hıçıuundu bıllay oramla bla bargan: baulada iynekle, celinleri
da sütden tolup, ana ua, çıçkın bla buzouçuknu da koruy, iynegin kıstau
sauganı; künnü uzunu sürüuden arıp kelip, halcar allında, uzun agaç şintikge
olturup turgan attanı katına barı oltura, sırtıñı buruuga tıyandırıp, kökde kalın
çaçılgan culduzlaga karagan. Sora, kancal çelekni da alıp, terek katında çıkgan
suudan çelegiñi tolturup, suunu mılı iyisin solugan.
Arıgan adamla, kalkıu ete, cukuga bölünedile: kimi üyde,
kimi catmada, kimi koşda.
Sabanladan mirzeu iyis keledi. Koşçulanı koşlarında eşikleri
az açılıp, uzakdan canıuarla etgen tauuşla keledile. Karañı keçeni başında «Cetegeyle»
canadıla. Malla koşlada kalkıu etedile.
Culduzla muthuzlana başlaydıla, köknü cuka, sıydam bulutla cabadıla.
Keçe ortasında, anda-mında üy başlaga tamıçıla tamadıla.
Bulutla erttenlikge çaçılırla. Agaç kıyırlaga çars tuman catar.
Tañ atarga kırdıkda, bahçalada, tereklede çık canar. Sora ol seyir şoşlukda,
tañ ata, adam uyanadı.
Agaç, tañnı burnu bla gürüldep başlaydı. Uçarga
hazırlanñança, tukuzgü terekle çaykaladıla, kızgıl çopalları bulgana. Kayın
terekle subay süeledile, tömmeklerinde tauuş uüp, çapırakları uçadıla.
Nazı agaçda ua kaygılıdı. Ol biteu da çıkırdaydı. Tamırları,
buzlap kalgança, biri birine çulganıpdı. Terekle çaykaladıla, tamırları ua, ayak
tübüñde aylanñança, çıkırdaydıla. Nazı terekleni ortası bla ayaklarıñı keñ sala
barsañ, başıñ tögerek aylanadı. Sora kök tepsep aylanñança boladı. Andan ese
tap cerge olturup, közleriñi kısıp tursañ macaldı.
Elde ua horazlanı kıçırgan tauuşları şoşluknu buzadıla. Mal
ökürgen tauuşla, ol ugay eseñ, eşekni sagat san bla okugan tauuşu da
seyirsindiredi. Tereze allında terek bar ese, ol künça, üyge carıgın iedi. Sora
otouda, köp bolmay ot etgença, cılı boladı. Tamatala işge, sabiyle şkolga
aşıgadıla.
Oramnı örge bara, şkolga aşıgıp, kart attaga coluga, caşla
salam beredile. Cañı cete kelgen caşlanı körgen atta, kesin cigitçik ete, caş
zamanı esine tüşe, arkasın da tüzete, salamın ala, kayrı ahşı colga barganın
surar. Şkolga aşıkgan caşha: «Da, kuuanıp kayt, cigit»,- dep, ızından algış
eter. Ol «kuuanıp kayt» degen sözde ua nença magana bardı. Atta, calan da beşle
alıp kel demeydi. Kesiñden tamataga, gitçege da namıs bere, haliñ, kılıgıñ bla
da, olturganıñ, kophanıñ bla da, nizamıñ, sıyıñ bla da ülgülü bola, anı üsüne
ua bilimiñ bla andagılanı da, üydegileni da kuuandır, degen magananı
sıyındıradı ol cañız söz.
Şkoldan kele, colnu enişge aylansañ a, kabak eşigini katında,
uzun agaç şintikge olturup, soluy turgan kart ınnanı katına barıp, sauluk-esenlik
suray, cumuşak kuçaklasañ: «Ay, nasıplı bala bolgun, ariu bala»,-dey, algış
eter. Inna, cılla cıyırthan kolçukları bla başıñı cumuşak sılar, köp ariu söz
ayta, albotasını hurcunundan kampetle çıgarıp berir.
Alay, colnu birsi canında ua, uuak caşçıkladan bir kauumu,
üy allında terekni oramga aylanñan canında, salınıp turgan butakların da
sındıra, tagılıp, sarı, kızıl almalanı üzerle. Anı körgen iesi: «Ay, kalmagın,
ol terekni alay uuatmasañ a»,- dep açıulanır. Sora hıliçi caşçıkla, eterlerin
da etip, kaçarla. Kim biledi, colnu birsi canında amma alaga kargış aytırga süe
da bolmaz edi. Alay ol caşauda bola kelgen işdi. İgilik bla amanlık birge
bargança, algış bla kargış da birge baradıla caşauda. Anı bir zamanda, bir kişi
tohtatalmagandı em tohtatırga madar da cokdu.
İñir bola, bulutla cıyıladıla. Ala enişge enerle, sora suuuksuragan
hauada, kar iyis sezilir.
Sora ol keçeden başlap, kış suuugu cetginçi, suuuk küz artı cauunla
başlanırla, terekleni butakların tüşüre, agaçlada, tüzlede, üy başlada
keslerini mudah cırların aytırla.
Allay künle, uzakga sozulmay, kışhı künlege alışınadıla. El
ak karga bölenedi. Kışnı erttenñi suuugu betiñi, burnuñu çimdiydi. Ak karnı
üsünde adam ızla körünedile.
Üy ocakladan tütün, üzmelt-üzmelt, çıgadı. Peç allında otun kalau
kepçiy turadı, alanı tübünden kayın agaç iyisi keledi. Ana peçni içine agaç carkalanı
taplaşdırıp tizedi, zıbır kolları bla tamızık salıp, aña sirnekni tartadı. Çırak
tamızık terk kabınadı. Sora otnu kızıl tili otunlanı calay, ot gürüldey
başlaydı.
Endi peçni plitasın açıp, çoünnu salırga boladı. Kızgan
tauaga cañı köpgen tılını salıp, ana gırcınnı kızıl bişiredi. Üynü içine cañı
bişgen cılı gırcınnı iyisi cayıladı. Ol iyis arbazga, oramga da cete, elge
bereket beredi.
Eşikde tañ igi da carıgandı. Ananı peçi ua çır-çır ete canadı,
çoünda hıçinlik kartohları bişip, tübündegileri küe başlagandıla. Peçde
otunlanı tübündegileri küyüp, kızıl mıdıh bolgandıla. Ala, canları bolgança,
«közlerin» aça-cuma turadıla.
Bir kesekden ananı sozulgan, caulu hıçinlerine üyür cıyıladı.
Ananı ak caulukga çulganñan cılı gırcını da arlakda tılpıu etedi.
Terek tüplede kar catadı. Terek butaklanı uzunluklarına
sozulup cathan kar töbenñide, cıltırauuk bukuça, çaçılır, sora terek butakla karnı
auurlugundan kutulup, çaykalırla. Carık cırçıkları bla çorbat çıpçıkla bir
terekden bir terekge konarla.
Bizni caşagan ceribiz biyik tauları, kayaları bla, tögeregin
bulutla kurşalagan, ariu cerleri bla atın aytdırgan cerdi.
Seyirlik, tolu caşaunu suratlaydı tögerek. Seyirlik körünedi
bu eki elni, Canhotiya bla Laşkutanı, ortası bla bargan Bahsan suuu: kıyırları
bla caşil bitimle, canlarında ulöku, türtü, cabışmak terekle. Anı cagasında,
kögetlerin da cıya, ösgenbiz. Har adamga da, kesini ösgen cerinde, tuugan cerine,
anı tabiygatına süymeklik tuuadı. Ceriñi har cerçigi da, caşil türsünñe
kiyinip, ariu iyisden tolup, bereketin üsüñe tögedi, caşauda tolu boladı.
Tögerekni caşil kiyiminde, ariu güllerine tumalanıp, kesiñi nasıplıga sanaysa.
Kün cılıthan ceriñi gokka hanslarını duh iyislerini içinde senden nasıplı
bolmagançadı. Ceriñi türsünleri, darman iyisleri, tauuşları mamır, tolu caşaunu
suratlaydıla. Ol kündüz körgen, sezgen zatlanı, keçe tüşüñde körüp kuuanasa.
Keçe tüşüñde kelgen tabiygat alay carıkdı, açıkdı, taza.
Tabiygatha, ceriñe cuuukluk, uçundurgan etedi. Har bitimni,
har süyüp körgen zatnı da bir teren maganası boladı. Kuuançlı caşay, künça carık
duniyada, kesiñi nasıplı duniyanı bir çöpçügüne sanaysa. Bir can da buzalmazlıkça
körünedi ol sen sınagan rahatlıknı, ariuluknu.
Har cañı tuugan kün da cüregiñi kuuançdan tolturadı.
Bereketden tolgan bahçala, tögerekde kögetleden bay terekle kuuandıradıla.
Kalay hıçıuundu, biyik terekni çapırak salkınına çıgıp
olturgan! Mında terek butaknı üsünde kesiñi bir gitçe burhuçukça sezese. Sora,
senden da korkmay, honşu butakga, carık cırların da ayta, çıpçıkla konarla.
Kalay hıçıuundu, calan ayak etip, şaudan suuga enip, andan
toygan, enişge iyilip, anı auanasında köknü carıgın körgen!
Kesini carık cırçıgın ayta çaphan şaudan suuçuknu tübünde cuuunñan
taşçıklanı kirsizliklerine karagan!
İyilip, betiñi cuusañ, tap-taza suu burçakla kollarıñdan sarka,
hıçıuunluk beredile. Başıñ bla ua cazgı kamıcakla cızılday uçarla.
Örge, kökge karasañ a, kaltıragan hauanı butaklarını
arasından teren, kıyırı-çegi bolmagan duniyanı keñligin körürse. Ak, cumuşak
bulutla kökde cüzedile. Ol ullu da, keñ da köknü içinde ua, kanatların da keñ cayıp,
ariu kanatlı uçadı.